Elliði Vignisson, bæjarstjóri  Ölfuss, hyggst ekki gefa kost á sér í formannskjör á landsfundi Sjálfstæðisflokksins á næsta ári. Hann ber fullt traust til Bjarna Benediktssonar, þrátt fyrir að vera á öndverðum meiði í orkupakkamálinu. Elliði staðfesti þetta við Eyjuna í dag.

Elliði hefur lýst andstöðu sinni við innleiðingu þriðja orkupakkans í skrifum sínum undanfarið og farið þannig þvert gegn forystu Sjálfstæðisflokksins, sem nú mælist með aðeins 19% fylgi í könnunum, en flokkurinn hefur aldrei mælst lægri. Hefur Elliði verið orðaður við formannskjör á landsfundi Sjálfstæðisflokksins á næsta ári sökum skrifa sinna, en sá orðrómur er hvað háværastur úr röðum andstæðinga þriðja orkupakkans, sem sjá Elliða sem tilvalinn frambjóðanda síns málstaðar.

Stendur ekki til að skipta um formann

Eyjan spurði Elliða hvort hann hefði í hyggja að bjóða sig fram gegn Bjarna Benediktssyni:

„Ég hef nú ekki heyrt þessa kjaftasögu, en ég held nú að einhvern tíma verði fólk þreytt á þessum samkvæmisleik að máta mig sífellt við alla framboðslista, mér dettur í hug að það gæti verið vírus í tölvunni í Valhöll, ég er orðaður við svo marga lista. En ég hef aldrei tekið að mér flokkslegt embætti, ég sit í dag sem embættismaður, en ekki kjörinn fulltrúi. Þá stendur ekki til að skipta um formann í Sjálfstæðisflokknum,“

segir Elliði og bætti við:

„Þetta er bara svona sumarsamkvæmisleikur sem ég gef ekkert fyrir, við erum með öflugan formann, sem nýtur víðtæks trausts meðal sjálfstæðismanna og ég er einn af þeim. Helsta áhyggjuefnið er að ef sjálfsstæðismaður hefur skoðun, þá er byrjað að máta hann í formannsstól. En það merkir bara eitt fyrir mér, það er eftirspurn eftir röddum meðal sjálfstæðismanna og þetta er fyrst og fremst áskorun á sjálfstæðismenn að láta í sér heyra.“

Ágreiningur styrki flokkinn

Elliði telur að orkupakkamálið muni styrkja flokkinn, þó svo hann hafi tekið dýfu niður á við síðan að málið kom upp og mælist aðeins með 19 prósenta stuðning í könnunum:

„Ég held að þetta muni styrkja flokkinn, við erum með mjög öflugan mann í brúnni og öflugan utanríkisráðherra og ég er algerlega sannfærður um að þetta mál sé einmitt til þess fallið að þeir sýni hvers megnugir þeir eru og við komum sterkari út úr því.“