Íslenskir barna- og ungmennabókahöfundar gáfu út yfirlýsingu í dag. Í yfirlýsingunni fordæma þeir brottvísanir íslenskra stjórnvalda á börnum sem eru á flótta ásamt fjölskyldum sínum. 

Þá er vísað í Barnasáttmála Sameinuðu þjóðanna sem hefur verið lögfestur hér á landi. Samkvæmt sáttmálanum ber stjórnvöldum skylda að hafa ávallt hagsmuni barna í forgangi.

Fjöldinn allur af íslenskum barna- og ungmennabókahöfundum skrifuðu undir yfirlýsinguna en þar má nefna Sigrúnu Eldjárn, Ævar Þór Benediktsson, Sif Sigmarsdóttur, Gunnar Helgason og Birgittu Haukdal. 

Brottvísanir á flóttabörnum hafa verið mikið í umræðunni undanfarið eftir að brottvísununum var mótmælt í miðbæ Reykjavíkur í síðustu viku. Samkvæmt upplýsingum frá aðstandendum mótmælanna hafa íslensk yfirvöld synjað 75 börnum á flótta um alþjóðlega vernd það sem af er þessu ári, að meðaltali 12 börnum í hverjum mánuði.

Yfirlýsinguna í heild sinni ásamt undirskriftunum má sjá hér fyrir neðan.

  „Við, íslenskir barna- og ungmennabókahöfundar sem undir þetta ritum, fordæmum brottvísanir íslenskra stjórnvalda á börnum á flótta og fjölskyldum þeirra. Samkvæmt Barnasáttmála Sameinuðu þjóðanna sem hefur verið lögfestur hér á landi ber stjórnvöldum alltaf að hafa hagsmuni barna í forgangi. Við teljum ekki forsvaranlegt að senda börn á flótta til Grikklands þar sem aðstæður í hæliskerfinu hafa verið metnar ófullnægjandi og ekkert bíður þeirra nema gatan. Það hlýtur að vera grundvallaratriði að mál barna á flótta séu metin á þeirra forsendum.

 Við teljum það algjörlega óviðunandi að 75 börnum hafi verið synjað um vernd á Íslandi það sem af er árinu og hvetjum stjórnvöld til að virða Barnasáttmálann og hafa hagsmuni barna ávallt að leiðarljósi við alla ákvarðanatöku.

 Við bendum á að Íslendingar teljast, samkvæmt öllum mælikvörðum, ein ríkasta þjóð heims og okkur ber að axla ábyrgð á við aðrar þjóðir er kemur að vanda fólks á flótta frá stríðshrjáðum svæðum. Mikill auður felst í fjölbreytilegu mannlífi og fólk með ólíkan bakgrunn og reynslu auðgar samfélag okkar og við eigum að taka því fagnandi. “

Undirskriftir: 

Arndís Þórarinsdóttir

Benný Sif Ísleifsdóttir

Bergrún Íris Sævarsdóttir

Birgitta Elín Hassel

Birgitta Haukdal

Bryndís Björgvinsdóttir

Brynhildur Þórarinsdóttir

Davíð Hörgdal Stefánsson

Elísa Jóhannsdóttir

Gunnar Helgason

Hildur Knútsdóttir

Hilmar Örn Óskarsson

Hjalti Halldórsson

Ingibjörg Valsdóttir

Jenný Kolsöe

Jóna Valborg Árnadóttir

Katrín Ósk Jóhannsdóttir

Kristín Helga Gunnarsdóttir

Kristín Ragna Gunnarsdóttir

Linda Ólafsdóttir

Margrét Tryggvadóttir

Ragnheiður Eyjólfsdóttir

Ragnheiður Gestsdóttir

Ragnhildur Hólmgeirsdóttir

Sif Sigmarsdóttir

Sigrún Eldjárn

Vala Þórsdóttir

Þórdís Gísladóttir

Þorgrímur Þráinsson

Ævar Þór Benediktsson