Sautján mánuðir eru nú frá því að Lamar Odom fékk 12 heilablóðföll og hjartaáfall á vændishúsi í Nevada. Í nýlegu viðtali við NBA stjörnuna segist hann vera gangandi kraftaverk. Lamar og Khloé Kardashian eiga að baki stormasamt hjónaband en Khloé sótti um skilnað í maí 2016. Skilnaðurinn gekk formlega í gegn í byrjun mars á þessu ári.

Lamar segir að honum hafi lengi tekist að fela eiturlyfjafíkn sína fyrir Khloé en hún hafi fyrst komið að honum að nota fíkniefni árið 2011. Eftir það vissi hún að hann notaði kókaín á hverjum degi.

Þá segir hann frá því að hann hafi fyrst fengið að kynnast því hvernig það er að vera frægur eftir að hann kynntist þáverandi eiginkonu sinni. Fólk sem hafði engan áhuga á körfubolta sýndi honum áhuga og kvenfólk flykktist upp um hann.
Lamar viðurkennir sömuleiðis fúslega að hann hafi oft haldið framhjá Khloé. „Ég vildi að ég hefði sleppt því.“