Minnst sjö af þeim átta umsækjendum sem ekki voru metnir mjög vel hæfir til að gegna starfi seðlabankastjóra, hafa andmælt matsferlinu og telja verulega vankanta á málsmeðferð hæfisnefndarinnar. Bera þeir við að nefndin hafi ekki gætt jafnræðis umsækjenda, ekki sinnt rannsóknarskyldu í skilningi stjórnsýslulaga og ekki framkvæmt heildstæðan samanburð á umsækjendum. Fréttblaðið greinir frá.
Þá furða umsækjendur sig einnig á því að ekki séu teknar til greina í ráðningarferlinu þær miklu breytingar sem verða á starfsemi Seðlabankans við sameiningunni við Fjármálaeftirlitið, sem sé verulegur ágalli þar sem eðli starfs seðlabankastjóra mun breytast og krefjast meiri stjórnunarhæfileika en áður. Því sé spurning hvort hægt sé að taka mark á hæfnismatinu.
Tólf voru boðaðir í viðtal af hæfisnefndinni í fyrstu umferð. Þau Arnór Sighvatsson, Ásgeir Jónsson, Gylfi Magnússon, Jón Daníelsson og Katrín Ólafsdóttir voru í kjölfarið boðuð í aðra umferð viðtala, þar sem komið var inn á stjórnunarhæfileika, stjórnunarstíl og umfang mannaforráða, en þau atriðið voru nánast ekkert rædd í fyrstu umferð.
Þar af leiðandi töldu þeir sem ekki voru boðaðir í seinni umferðina að jafnræðisreglan hafi verið brotin, þar sem þeim gafst ekki kostur á að ræða um stjórnunarhæfileika sína fyrir nefndinni og því hafi nefndin ekki fengið heildstæðan samanburð á umsækjendum.
Hæfisnefndin mat fjóra karla mjög vel hæfa til að gegna starfi seðlabankastjóra, en það eru þeir Arnór Sighvatsson, Ásgeir Jónsson, Gylfi Magnússon og Jón Daníelsson.
Þá taldi hún þau Gunnar Haraldsson, Gylfa Arnbjörnsson, Katrínu Ólafsdóttur, Sturlu Pálsson og Sigurð Hannesson vel hæf til að vera seðlabankastjórar.
Þeir sem töldust hæfir voru Ásgeir Brynjar Torfason, Jón Gunnar Jónsson og Vilhjálmur Bjarnason.
Katrín Jakobsdóttir forsætisráðherra mun skipa nýjan seðlabankastjóra í næsta mánuði.
