Heildarkostnaður við Söngvakeppnina og þátttöku Íslands í Eurovision í ár mun enda í um hundrað milljónum krónum. Þetta kemur fram í skriflegu svari Skarphéðins Guðmundssonar, dagskrárstjóra RÚV, við fyrirspurn DV um kostnað RÚV við Eurovision í ár.

Í þessum kostnaði er meðtalinn kostnaður við atriði Hatara og starfsfólk sem kom að framkvæmd þess. Skarphéðinn telur að kostnaður fari ekki fram úr áætlun.

„Venju samkvæmt gerum við ráð fyrir að hann verði í samræmi við áætlanir sem gerðar hafa verið fyrir Söngvakeppni og Eurovision og að rekstur verkefnisins í heild, að teknu tilliti til tengdra tekna, komi til með að standa undir sér,“ segir Skarphéðinn.

Fylgdarlið Hatara í Tel Aviv taldi alls ellefu manns, þar af níu aðilar á vegum RÚV sem komu með beinum hætti að sjálfu atriðinu; umgjörð, útfærslu og flutningi þess, þar með taldir sexmenningarnir í Hatara-hópnum sem fluttu lagið á sviðinu. Starfsmenn RÚV í Tel Aviv voru átta talsins sem koma með beinum hætti að framkvæmdinni við þátttöku í keppninni, framleiðslu atriðisins sjálfs og annarri tengdri dagskrárgerð fyrir alla miðla RÚV bætir Skarphéðinn við.

Í fyrra nam kostnaður við þátttöku Íslands í Eurovision níutíu milljónum og er því kostnaður um tíu milljónum króna meiri í ár en í fyrra, en það var Ari Ólafsson sem var fulltrúi Íslands í Eurovision á síðasta ári.