Jón Gunnarsson, þingmaður Sjálfstæðisflokksins og formaður Umhverfis- og samgöngunefndar, ræddi nýtt frumvarp til umferðarlaga í Bítinu á Bylgjunni í morgun.

Meðal breytinga í frumvarpinu er lækkun á viðmiði leyfilegs magns vínanda í ökumönnum úr 0.5 prómillum í 0.2 prómill. Mælist ökumaður með 0.2 – 0.5 prómill af vínanda verður hann ekki sviptur ökuleyfi á staðnum líkt og hingað til, heldur verða teknir af honum bíllyklarnir og hann dæmdur til sektar.

„Eftir einn ei aki neinn er auðvitað markmiðið og skilaboðin í þessum endurskoðuðu umferðarlögum eftir margar atlögur og langan tíma og mér sýnist bara góð sátt um þessar breytingar,“

sagði Jón í morgun og bar við að þetta myndi hjálpa lögreglunni að ná þeim sem væru virkilega hættulegir í umferðinni, því þeir sem væru búnir að fá sér einn öl teldust ekki hættulegir umhverfi sínu, að mati sérfræðinga sem Samgöngunefnd talaði við:

„Þú ert stoppaður og mælist með 0.2 og ert sannarlega ekki hættulegur umhverfi þínu, búinn að fá þér einn öl eða svo. Ef það ætti að svipta þig, þá yrði að fara með þig í blóðprufu. Og við teljum bara að það sé betra að lögreglan stöðvi för slíkra aðila, taki lyklana af þeim á staðnum, þeir verða að sækja bílinn og bjarga sér með það, vegna þess að ef lögreglan þarf að fara upp á spítala með þig í blóðprufu, eða til læknis, þá er hún ekki að stoppa bíla á meðan og þá keyra kannski einhverjir framhjá á meðan sem eru stórhættulegir umhverfi sínu. Og þetta er fyrst og fremst í okkar huga, að við séum að nýta krafta lögreglunnar betur til að ná til þeirra sem raunverulega eru hættulegir umhverfi sínu,“

sagði Jón.

Alls 46 umsagnir hafa borist um frumvarpið, en ekki er að sjá að nein þeirra lúti að þessari breytingu varðandi lækkun á magni vínanda ökumanna.