Íslendingar geta verið stoltir af liðsmönnum Hatara sem nældu sér í 10. sæti í nýafstaðinni Eurovision-keppni. Það er óumdeilanlegt að framlag Íslands þetta árið, Hatrið mun sigra, hafi verið umdeildasta atriði sem Íslendingar hafa sent út í þennan stærsta sjónvarpsviðburð ársins og var það ljóst frá fyrsta degi að Hataraliðar myndu viðra sínar pólitísku skoðanir um hernámið í Ísrael í aðdraganda keppninnar. Þá lýstu þeir yfir eindregnum stuðningi við Palestínu.
Í ljósi þess hve eldfim þátttaka Hatara var í Eurovision voru smíðaðar ýmsar samsæriskenningar um hvernig Ísraelsmenn reyndu að þagga niður í Höturum og koma í veg fyrir að þeir bæru sigur úr býtum í keppninni. Hér eru nokkrar þeirra.
Það vakti athygli landsmanna á úrslitakvöldi Eurovision að Matthías Tryggvi Haraldsson, annar söngvari Hatara, virtist ekki vera í takti við lagið á einum tímapunkti, líkt og hann heyrði ekki í laginu. Þá fóru samsæriskenningar á flug, bæði hér heima og erlendis, um að þetta væri enn ein tilraun Ísraelsmanna til að þagga niður í Hatara.
Okay guys it is soooooo soooooo obviously that Israel is trying to destroy Iceland’s Eurovision things this year. I mean, c’mon guys be a little friendly!!
It was not an accident that Matthia’s ear monitor fell out. ? please, vote for 17!!?❤️ #12stig #eurovision
⬇️⬇️⬇️⬇️⬇️⬇️⬇️ pic.twitter.com/lbfvElkA9d— eurovision song contest reviews (@contest_reviews) May 18, 2019
Þá héldu einhverjir því fram að ísraelska sjónvarpsstöðin KAN hefði skipt í upptöku af dómararennsli í lagi Hatara því forsvarsmenn stöðvarinnar hræddust mótmæli Hatara á sviðinu í beinni útsendingu. Þessi upptaka hér fyrir neðan sýnir að svo var ekki:
Hins vegar er vert að benda á að enginn annar flytjandi á úrslitakvöldi Eurovision átti í vandræðum með hljóðið sjálft, þó söngurinn hafi ekki alltaf verið upp á marga fiska.
Einhverjir hafa haldið því á lofti að Hataraliðar hafi nýtt tækifærið á úrslitakvöldinu, þegar að atkvæði úr símakosningu voru opinberuð, til að halda fána Palestínu á lofti til að leggja sitt á vogarskálarnar að RÚV yrði vísað úr keppni í sparnaðarskyni.
Þessi kenning virðist þó vera ansi ólíkleg þar sem Hatarar hafa verið trúir sinni sannfæringu allt frá upphafi Eurovision-ferlisins.
„Það var ekkert annað í stöðunni, það er ekki hægt að halda svona keppni sem á að snúast um sameiningu og frið meðal manna, sem er fallegt í sjálfu sér, en miðað við það sem á sér stað í þessu landi er ekki hægt að líta fram hjá því. Við viljum að listin minni á stærra samhengið,“ sagði Matthías í samtali við RÚV eftir úrslitakvöldið.
Eitt sem var ansi gegnum gangandi í keppninni í Tel Aviv var hve stuttan sjónvarpstíma Hataraliðar fengu frá því að flutningi þeirra á Hatrið mun sigra lauk og þar til kynnar komu á skjáinn. Aðili í aðdáendaklúbbi Eurovision á Íslandi á Facebook ákvað að mæla þennan tíma í fyrri undankeppni, allt frá síðasta tóni og þar til Eurovision-stjarnan var sýnd. Niðurstöður þessara mælinga voru að öll lögin fengu átta til ellefu sekúndur nema Ísland sem fékk 3,4 sekúndur.
Þá tóku sjónvarpsáhorfendur eflaust eftir því að þeir áhorfendur sem sýndir voru eftir atriði Hatara voru ekki klappandi, ólíkt þegar sýnt var frá hinum atriðunum. Það er þekkt að átt við sé útsendinguna með þessum hætti, til dæmis þegar ekki heyrðist að púað var á rússneska flytjandann Polinu Gagarinu í Vín árið 2015.
Hatari fékk aðeins 48 stig frá dómnefndum Evrópulandanna en 186 stig úr símakosningu almennings. Sú samsæriskenning hefur heyrst að forsvarsmenn KAN hafi mútað dómnefndum víðs vegar úr Evrópu til að halda stigum Íslands í lágmarki.
Þetta er ekki í fyrsta sinn sem sú kenning er viðruð að dómnefndum sé mútað. Lagið Congratulations með Cliff Richard var líklegast til sigurs í Eurovision árið 1968. Hins vegar fór það svo að lagið La La La með Massiel frá Spáni vann með aðeins eins stigs mun. Strax fóru sögusagnir á kreik um að spænski einræðisherrann Francisco Franco hefði mútað dómnefndum til að tryggja sigur Spánar svo keppnin yrði haldin þar að ári. Vildi hann sýna sem flestum hve frábært land og þjóð væri.
https://www.youtube.com/watch?v=UsLcZwCztms
Mikla athygli vakti nokkrum dögum fyrir úrslitin í Eurovision í ár að dómnefndin í Hvíta-Rússlandi opinberaði stigagjöf sína. Í opinberun Hvít-Rússa kom fram að dómnefndin væri ekki par hrifin af framlagi Íslands og hefði dregið það niður. Samband evrópskra sjónvarpsstöðva bannað því að stig dómnefndar yrðu gild á úrslitakvöldinu, enda með öllu óheimilt að opinbera stig dómnefndar fyrr en eftir úrslitakvöldið, þar sem það getur haft áhrif á kosningu. Einhverjir hafa velt fyrir sér hvort Hvít-Rússar hafi verið í slagtogi með Ísraelsmönnum og tekið sérstaklega fram að dómnefnd hafi dregið íslenska atriðið niður.
