Hataraliðar brugðu á leik fyrir dómararennsli nú rétt í þessu og gáfu ástralska keppandanum Kate Miller-Heidke, sem spáð er öðru sæti í keppninni, sleggjuna sem Einar trommugimpi er búinn að nota í atriði Hatara í Tel Aviv

Eins og sýnt er frá í Instagram-sögu RÚV ákváðu Hataraliðar að afhenda Kate sleggjuna sem þakklætisvott og til að tjá henni lotningu sína. Hafi þeir fylgst með hugrekki hennar og þori og séu fullir virðingar í hennar garð.

Þá sögðu þeir að um væri að ræða fyrstu heiðurssleggju Hatara og ætti Kate að nýta sér hana til að rústa andstæðingnum á friðsælan máta.

Kate var augljóslega mjög upp með sér yfir gjöfinni og tók auðmjúk á móti henni. Hvaða grip Einar notar þá í úrslitum annað kvöld eða hvort þetta sé sama sleggja og fleytti Hatara áfram í undanúrslit er óljóst og aðdáendur skiljanlega ringlaðir yfir þessu útspili sveitarinnar.