Hollenski keppandinn Duncan Laurence, sem margir tippa á að vinni Eurovision með laginu Arcade, kom öllum í opna skjöldu á blaðamannafundi eftir seinni undankeppnina í gærkvöldi. Duncan kom út úr skápnum sem tvíkynhneigður á fundinum.

Þessi opinberun kom í kjölfar þess að Duncan var spurður hvaða þýðingu það hefði að komast áfram í úrslit.

„Áður en þetta byrjaði allt saman var ég lagahöfundur og samdi lög í svefnherberginu mínu og þetta tækifæri þýðir að ég get sýnt mig sem listamann, en einnig sem manneskju,“ sagði Duncan. „Ég er meira en bara listamaður. Ég er manneskja, ég er lifandi, ég er tvíkynhneigður, ég er tónlistarmaður, ég stend fyrir hluti. Og ég er stoltur af því að fá tækifæri til að sýna hvað og hver ég er.“

Margir aðdáendur Eurovision hafa fagnað þessari opinberun Duncans og eru stoltir af honum að segja frá þessu á þennan hátt.

Duncan hefur trónað á toppi veðbanka yfir líklega sigurvegara í Eurovision og varð engin breyting þar á eftir gærkvöldið.