Valgerður Árnadóttir er nýjasti gestur Föstudagsþáttarins Fókus, hlaðvarpsþáttar dægurmáladeildar DV. Valgerður er meðstjórnandi hjá Samtökum grænkera á Íslandi og er virk í starfi Pírata í Reykjavík.

Í þættinum ræða Valgerður og Guðrún Ósk þáttastjórnandi um veganisma og fara um víðan völl. Valgerður hefur verið vegan síðan 1. janúar 2016 en hefur verið grænmetisæta mun lengur. Hún segir frá skelfilegu atviki sem varð til þess að hún sagði skilið við svínakjöt aðeins tólf ára gömul.

„Ég er búin að vera grænmetisæta mjög lengi og það sem er kallað fiskiæta líka. Ég ólst upp við mikið frjálsræði í Svíþjóð þar sem ég var mikið í nánd við dýr og hef alltaf verið mikill dýravinur. Svo flutti ég heim til Íslands þegar ég var tíu ára og stuttu eftir að ég flutti heim fórum við í ferðalag og tjölduðum fyrir austan í lok ferðalags okkar,“ segir Valgerður og rifjar upp atvikið.

„Ég vakna upp við einhver hræðileg öskur og læti. Það kom alltaf hræðilegt öskur og svo hvellur, og þá var það búið. Svo kom aftur hræðilegt öskur. Þetta var einhver martröð sem ég vaknaði upp við. Þá föttuðum við að við höfðum tjaldað við hliðin á sláturhúsi og það var verið að slátra grísum. Þá tók ég ákvörðun, að verða tólf ára gömul, að ég skildi aldrei aftur borða svín og ég held ég hafi staðið við það,“ segir Valgerður

Hún segir að þarna hafi hennar vegferð að verða grænmetisæta hafist. „Ég tók út svín og kjúkling og fljótlega eftir það varð ég fiskiæta og var það svona í rauninni fram að því að ég varð vegan.“

Þetta var árið 1991 og var framboðið í verslunum fyrir grænmetisætur í takt við tímann. Valgerður segir að afar lítið hafi verið í boði fyrir hana og úrvalið af grænmeti hafi einnig verið lélegt.

„Ég held ég hafi bara borðað pasta og kartöflur í svona fimm ár, með fiskinum sem ég át. Það var ekkert rosalega heilbrigt mataræðið mitt þessi fyrstu ár sem ég var grænmetisæta,“ segir Valgerður.

Hlusaðu á Föstudagsþáttinn Fókus í heild sinni hér að neðan.