Meira en hundrað íslenskir hermenn létu lífið í orrustum fyrri heimsstyrjaldar en yfir þúsund Íslendingar börðust í henni. Vefsíðan Lemúrinn fjallaði um málið á sínum tíma og þar segir meðal annars:
„Ríflega 1200 Íslendingar börðust í stríðinu, flestir þeirra fyrir Kanadaher en sumir fyrir Bandaríkjaher. Þó að um Vestur-Íslendinga hafi verið að ræða fæddist um þriðjungur þessara manna á Íslandi. 144 týndu lífi og fjölmargir slösuðust.“
18 ára drengur fæddur á Laugavegi í Reykjavík var til dæmis skotinn til bana í skotgröfunum í september 1918.
Lemúrinn birtir ljósmyndir af mörgum íslenskum hermönnum sem létu lífið og fjallar um íslenska hjúkrunarkonu sem hjúkraði særðum hermönnum. Hún hét Kristín Friðriksdóttir og var fædd á Hamri í Hegranesi í Skagafjarðarsýslu árið 1896. Hún lést aðeins 22 ára gömul úr spænsku veikinni.
Áhugasamir geta lesið meira um málið á Lemúrnum.
