Lisa Marie Presley, einkadóttir Elvis Presley, er að skilja við fjórða eiginmann sinn, tónlistarmanninn Michael Lockwood, eftir tíu ára hjónaband. Hún ber hann þungum sökum en skilnaðarmálið er fyrir rétti. Lisa Marie segist hafa fundið mörg hundruð óviðeigandi myndir af börnum í tölvu eiginmannsins. Hún segist hafa orðið skelfingu lostin og fundið til líkamlegrar vanlíðunar. Lockwood segir þessar ásakanir rangar og sakar eiginkonuna um að vilja eyðileggja mannorð hans. Hjónin eiga saman tvíburadætur og sögur komust á kreik um að þær væru í vörslu barnaverndarnefndar en móðir Lisu Marie, Pricilla Presley, segir þær vera í sinni umsjá.
Lockwood krefst þess að fá meðlag frá Lisu Marie en hún segist enga peninga eiga enda sé hún skuldum vafin, hún skuldi margar milljónir dollara í bakskatta og kreditkortareikninga og hús hennar sé yfirveðsett. Hún segir Lockwood hafa látið skuldfæra meira en milljón dollara á kreditkortareikning hennar. Hann neitar þessu og segir eiginkonu sína eiga mjög erfitt með að sýna heiðarleika og henni sé ógjörningur að bera ábyrgð á eigin mistökum.
Lisa Marie, sem er 49 ára, býr nú hjá elstu dóttur sinni, leikkonunni Riley Keough en hana átti hún með tónlistarmanninum Danny Keough. Sama ár og þau skildu giftist hún Michael Jackson en þau skildu eftir tveggja ára hjónaband. Þriðji eiginmaðurinn var leikarinn Nicolas Cage en það hjónaband stóð einungis í rúma 100 daga.
