Í gær bárust fréttir af því að Hera Hilmarsdóttir hefði verið ráðin til að fara með aðalhlutverk í kvikmyndinni Mortal Engines. Að baki myndinni stendur Jackson, Peter Jackson, sem er þekktastur fyrir þríleikinn um Hringadróttinssögu. Leikstjóri myndarinnar er Cristian Rivers.

Mortal Engines er byggð á samnefndri bók eftir Philip Reeve, úr bókaflokknum Predator Cities. Sagan gerist í framtíðinni en höfundurinn hefur hlotið ýmis verðlaun fyrir bókina, svo sem bókaverðlaun Guardian og Los Angeles Times.

Um er að ræða fyrstu Hollywood-mynd Heru. Hún mun leika hlutverk Hester Shaw. Robert Sheehan og Ronan Raftery fara með önnur aðalhlutverk. Gert er ráð fyrir að myndin verði sýnd í desember á næsta ári.

Hera staðfestir í orðsendingu til DV að þessi sé raunin, en getur ekki tjáð sig mikið um hlutverkið að svo stöddu. „Ég get staðfest að þetta er að gerast og ég er að fara í tökur á Mortal Engines í ár. Þetta er allt ennþá mjög nýtt og ég get ekki sagt mikið meira um það að svo stöddu annað en að þetta er frábært tækifæri og ég hlakka mikið til að vinna með þessu virta hæfileikafólki sem kemur að myndinni.“

Hún segir við DV að þangað til ætli hún að einbeita sér að Andaðu, leikritinu sem hún leikur í og sýnt er í Iðnó þessa daganna.