Paris Jackson, 18 ára dóttir Michael Jackson, var nýlega í viðtali hjá tímaritinu Rolling Stone. Þar talar hún meðal annars um samband sitt við föður sinn en hún saknar hans ákaft og segir hann hafa verið besta föður sem hægt var að hugsa sér. „Það er alltaf sagt að tíminn lækni öll sár en það gerir hann ekki, maður venst því bara,“ segir hún um dauða hans. Hún segir föður sinn vitja sín í draumum og bætir við: „Ég finn að hann er alltaf með mér.“

Árið 2013 komst í heimsfréttir að Paris, þá fimmtán ára, hefði reynt að fyrirfara sér. Hún segist í viðtalinu hafa nokkrum sinnum fyrir þann tíma reynt sjálfsmorð. Árum saman skar hún sig og tókst á einhvern hátt að leyna því fyrir fjölskyldu sinni. Hún segist hafa verið full af vanmetakennd og fundist hún ekki geta gert neitt rétt. Í viðtalinu segist hún hafa orðið fyrir kynferðisofbeldi fjórtán ára gömul en ekki sagt neinun frá því. Gerandinn hafi verið ókunnugur karlmaður.

Paris fullyrðir í viðtalinu að faðir sinn hafi verið myrtur. Læknir Jacksons Conrad Murray var á sínum tíma dæmdur fyrir að hafa gefið Jackson skaðleg lyf en Paris telur að lyfin hafi ekki orðið honum að bana. Hún segir föður sinn hafa talað um að menn vildu drepa hann. Aðspurð hverjir hefðu átt að myrða hann segir Paris marga koma til greina. Þessi hluti viðtalsins hefur vakið mikla athygli fjölmiðla.

Paris er með rúmlega fimmtíu húðflúr, níu þeirra tengjast föður hennar. „Hann færði mér eintóma gleði,“ segir hún, „svo af hverju ekki að bera merki sem minna á gleði?“