Breski leikarinn Gordon Kaye, sem lést nýlega, hafði þjáðst af heilabilun í nokkur ár. Hann lést á hjúkrunarheimili. Kaye var þekktastur fyrir hlutverk sitt í gamanþáttunum Allo Allo! þar sem hann lék kaffihúsaeigandann René Artois. Þættirnir gerðust í seinni heimsstyrjöldinni og fjölluðu á gamansaman hátt um samband íbúa í frönskum bæ og þýsks hernámsliðs. Kaye lék í öllum 84 þáttunum, sem sýndir voru frá 1982–1992. Hann lék einnig hlutverk René á sviði og sömuleiðis lék hann í sjálfstæðum þætti af Allo Allo! sem gerður var árið 2007. Mótleikkona hans í Allo Allo! Sue Hodge sem lék þjónustukonuna Mimi heimsótti hann reglulega síðustu dagana sem hann lifði og hjúkraði honum af alúð.
Árið 1989 sendi Kaye frá sér sjálfsævisögu sína, Rene & Me, þar sem hann lýsti sér á unga aldri sem feimnum og samkynhneigðum unglingi. Keye varð fyrir alvarlegum höfuðáverka í bílslysi árið 1990 og fór í heilauppskurð. Hann mundi ekki eftir slysinu en bar ör á enni upp frá því. Hann þótti alla tíð fremur dulur maður og mikill fagmaður í starfi.
Kaye var eitt sinn spurður hvernig hann vildi að sín yrði minnst. Hann svaraði og sagði að hann vildi að fólk minntist sín með orðunum: „Hann kom okkur til að hlæja.“ – Og það gerði hann sannarlega!
