Ég er búin að reikna það út að hin bráðskemmtilega gamanþáttaröð, Cuckoo, frá BBC verður næst á dagskrá RÚV þriðjudaginn 31. janúar. Þetta er ansi löng bið og það er þungt í mér. Ég hafði horft á fyrstu tvo þættina með mikilli ánægju og beið með óþreyju eftir þeim þriðja. Það þriðjudagskvöld var í stað Cuckoo handboltaleikur úti í heimi. Ég hefði miklu fremur viljað horfa á Cuckoo. Næsta þriðjudagskvöld víkur Cuckoo enn og þá fyrir stefnuræðu forsætisráðherra. Ég hef ekkert á móti forsætisráðherra, held að hann sé alveg ágætis maður, en ég vildi samt miklu fremur horfa á Cuckoo en hann. Og er það ekki orðin tímaskekkja að sjónvarpa beint frá stefnuræðu forsætisráðherra? Það er miklu frekar útvarpsefni.

Hver er Cuckoo? kunna ókunnugir að spyrja. Ég ráðlegg þeim sömu að horfa á þættina um hinn vonlausa og galna tengdason og hinn ráðþrota heimilisföður sem vill helst losna við hann. Þættinir eru mjög fyndnir, það er að segja fyrir þau okkar sem hafa gaman af breskum húmor. Greg Davies er frábær sem langþreyttur tengdafaðir Cuckoos og er maður tilþrifamikilla svipbrigða. Hann var tilnefndur til BAFTA-verðlauna fyrir leik sinn í þáttunum og átti það sannarlega skilið. Atriðið þegar hann kom að tengdasyni sínum að hugleiða ofan á eldhúsborðinu er dæmi um vel heppnað gamanatriði. Það er nóg af þeim í þessum bráðskemmtilegu þáttum.