Nýja bílahöllin, Eirhöfða 11, Bílakjarnanum
„Ég er búinn að starfa við bílasölu frá árinu 1982 og við sjálfstæðan rekstur frá árinu 1988,“ segir Ingimar Sigurðsson, eigandi Nýju bílahallarinnar, sem stofnuð var fyrir 29 árum. Hún er með aðsetur í Bílakjarnanum að Eirhöfða 11 í Reykjavík. Þar er góð aðkoma og frábær aðstaða til að skoða og sýna bíla.
„Í gegnum tíðina höfum við tekið að okkur allar gerðir af bílum. Í upphafi lögðum við áherslu á ódýra bíla en undanfarin ár höfum við fært okkur meira yfir í að selja nýlega bíla. Stór hluti kaupenda eru bílaleigur en þær hafa verið uppistaðan í kaupendahópi nýlegra bíla eftir hrun.“
Að sögn Ingimars er bílasala á uppleið. „Straumurinn undanfarin misseri hefur hins vegar meira legið í nýja bíla og það hefur aðeins slitnað á milli sölu nýrra og notaðra bíla. Á þessu ári teljum við hins vegar að þetta leiti í sama far, þ.e. að sala á notuðum bílum muni haldast í hendur við sölu á nýjum bílum.“
Nýja bílahöllin er með yfir 150 bíla í sölu og afskaplega góða sýningaraðstöðu: „Við erum með 10 bíla innisal og 150 bíla útisvæði. Það er fágætt að bílasölur bjóði upp á svona stórt útisvæði og innisal að auki,“ segir Ingimar.
Að sögn Ingimars kappkostar Nýja bílahöllin að bjóða upp á rétt verð á notuðum bílum, í samræmi við verð á nýjum, og láta þannig kaupendur notaðra bíla njóta styrkingar krónunnar: „Við höfum reynt að hafa það að leiðarljósi að hafa verð á bílum rétt miðað við nývirði. Verð á notuðum nýlegum bílum, 3–5 ára, á að haldast í hendur við nývirði, með öðrum orðum að lækka eðlilega, við reynum að hafa það eins rétt og mögulegt. Á síðustu 12 mánuðum hefur gengið styrkst um 17% sem þýðir að verð á nýjum bílum hefur lækkað og við erum að reyna að útfæra það á notaða markaðinn.“
Sem fyrr segir er Nýja bílahöllin til húsa að Eirhöfða 11, í Bílakjarnanum. Opið er virka daga frá 10 til 18 og á laugardögum frá 12 til 15. Sími er 567 2277. Nánari upplýsingar á vefsíðunni nyja.is.
