Arthur Alansson, sem var handtekinn í ágúst síðastliðnum fyrir að hafa stolið bifreið með tveggja ára barni, var dæmdur í fimm mánaða fangelsi í Héraðsdómi Reykjavíkur í gær. Umrætt má komst í fréttir þann 17. ágúst síðastliðinn en þann dag sló þjóðina óhug þegar allir helstu fjölmiðlar landsins greindu frá því að bíl með tveggja ára barni innanborðs hefði verið stolið fyrir utan leikskóla í Rjúpnasölum í Kópavogi.
Faðir barnsins kom á leikskólann til að sækja barn sitt og skildi bílinn eftir ólæstan og í gangi. Í bílnum var tveggja ára barn hans. Á meðan faðirinn var inni stal Arthur bílnum og ók sem leið lá að Krónunni. Þar fannst bílinn skömmu síðar en þá hafði allt tiltækt lið lögreglu verið kallað út auk þess sem þyrla Landhelgisgæslunnar var kölluð út til að aðstoða við leitina.
„Ég átti aldrei að taka þennan bíl og ég hefði aldrei tekið hann hefði ég gert mér grein fyrir að það væri barn í aftursætinu. Þetta var eitt versta augnablik lífs míns,“ sagði Arthur í viðtali við DV nokkrum dögum síðar.
Hann hefur barist við vímuefnafíkn frá 13 ára aldri. Þá tók hann jafnframt fram að hann vildi hætta neyslu og hefði verið að bíða eftir plássi í afvötnun. Með þjófnaðinum braut hann skilorð.
„Ég var búinn að vera í rugli í nokkurn tíma því ég átti erfitt með að nálgast daglega skammtinn af morfínlyfjum og lenti í mikilli neyslu vegna þess,“ sagði Arthur þegar hann var spurður um bílstuldinn. „Þennan dag fór ég í algjört „blackout“.
Hann sagði það hafa verið eitt erfiðasta augnablik lífs síns að vakna í fangaklefa á Hverfisgötu og vera tilkynnt að hann hefði stokkið upp í bíl og ekið af stað með barn Magnúsar. „Ég á sjálfur barn, myndi aldrei gera barni mein og get rétt ímyndað mér skelfinguna sem hefur gripið foreldrana, þau vil ég biðja afsökunar frá mínum dýpstu hjartans rótum. Ég er svo Guðs lifandi feginn að barnið vaknaði ekki meðan á þessari stuttu bílferð stóð og að allt hafi farið eins vel og hugsast gat miðað við ömurlegar aðstæður.“
Þá kom jafnframt fram að Arthur væri staðráðinn í að snúa lífi sínu við. „Ég vil svo að lokum ítreka afsökunarbeiðni mína til foreldrana og vonandi fæ ég tækifæri til að biðja þau afsökunar augliti til auglitis einn daginn.“
Fram kemur í dómi Héraðsdóms Reykjavíkur að Arthur hafi verið undir miklum áhrifum metamfetamíns þegar hann stal bifreiðinni þennan dag. Var hann sakfelldur fyrir umferðar og hegninarlagabrot vegna atvikisins þann 17. ágúst síðastliðinn. Auk þess var hann einnig sakfelldur fyrir að hafa að ekið bifreið undir áhrifum ávana- og fíkniefna og fyrir að hafa ekið bifreið sviptur ökurétti.
Hann játaði sök skýlaust fyrir dómi en auk fangelsisrefsingarinnar hefur hann einnig verið sviptur ökuréttindum ævilangt.
