Þau sögðu sögu sína nýlega í sænska dagblaðinu Expressen í tengslum við umfjöllun um innleiðingu hertra reglna um orkudrykki. Sænska Livsmedelsverket, sem er matvælaeftirlitsstofnun landsins, hefur rannsakað neyslu ungmenna á orkudrykkjum og hefur í kjölfarið lagt til að þak verði sett á leyfilegt magn koffíns í þeim. Þetta er gert vegna margra alvarlegra atvika í tengslum við neyslu orkudrykkja.
Thea var lögð inn á sjúkrahús fyrir um hálfu ári eftir ofneyslu orkudrykkja en á þeim tíma drakk hún Red Bull og Powerking.
„Ég fékk mér fyrsta orkudrykkinn á milli klukkan sjö og átta um morguninn. Skömmu eftir að ég hafði drukkið helminginn af þriðju dósinni jókst hjartslátturinn mikið. Ég fékk verki fyrir brjóstið og átti erfitt með andardrátt. Það var eins og hjartað vildi hoppa út úr líkamanum.“
Síðan hneig hún niður og var í kjölfarið flutt á sjúkrahús. Þar voru gerðar margar rannsóknir á henni til að kanna hvort hún hefði fengið hjartaáfall. Svo reyndist ekki vera. Niðurstaðan var að hún hefði verið með of mikið koffín í líkamanum.
Saga Filip er svipuð en hann var að horfa á hokkíleik fyrir um ári. Hann gat ekki spilað vegna meiðsla og sat því og horfði á leikinn. Hann þurfti að taka hóstasaft á þessum tíma en hún innihélt morfín. Hann drakk síðan þrjár dósir af orkudrykk á stuttum tíma eins og Thea. Honum fór fljótlega að líða illa og fóru foreldrar hans með hann á sjúkrahús.
„Ég var mjög hræddur. Þetta var hræðilegt. Ég náði næstum ekki andanum og hafði verki fyrir brjósti.“
Evrópska matvælastofnunin EFSA hefur komist að þeirri niðurstöðu að 60 kílóa manneskja megi drekka einn orkudrykk á dag. Þá er hámarki koffínmagns í líkamanum náð.
