Viðar Þorsteinsson, framkvæmdastjóri Eflingar, greindi frá því á Facebook í gærkvöldi, að honum hafi verið hótað lögsókn vegna ummæla sem hann hefur látið falla um starfsmannaleiguna Menn í vinnu í fjölmiðlum. Krefst starfsmannaleigan afsökunarbeiðni og greiðslu einnar milljónar í skaðabætur vilji Viðar komast hjá lögsókn. Þarf afsökunarbeiðnin að birtast á heimasíðu Eflingar, og þá þurfi hann að birta grein á Vísi og Stöð 2 og til vara annarsstaðar.

Samkvæmt heimildum Eyjunnar sendi starfsmannaleigan frá sér sex hótunarbréf í gær og mun senda frá sér þrjú slík bréf í dag að auki, á aðila sem hafa fjallað um málið í fjölmiðlum.

Viðar segir í samtali við Fréttablaðið að hann hyggist ekki ætla að verða við beiðninni:

„Ég hef nú ekki í hyggju að bregðast við þessu.“

Bágar aðstæður verkafólks gagnrýndar

Efling hefur fordæmt vinnubrögð starfsmannaleigunnar mikið og segjast hafa gögn sem sýni að brotið sé á rétti starfsfólks, sem séu erlendir verkamenn:

„Tugir starfs­manna frá Rúmeníu hírast í her­bergjum, allt að tíu saman, en borga þó fimm­tíu þúsund krónur á mánuði fyrir. Í ráðningar­samningi frá fyrir­tækinu sem Efling-stéttar­fé­lag hefur undir höndum er klausa sem segir að undir­ritaður skuldi leigu sem Menn í vinnu megi draga frá launum, án þess að upp­hæð eða nokkurs konar leigu­vernd sé til­tekin.“

Færsla Viðars ásamt mynd af bréfinu:

„Í kvöld var dyrabjöllunni hringt heima hjá mér og mér fært stórt pappírsumslag með nafninu mínu handskrifuðu á. Glaðningurinn reyndist svo vera hótun um lögsókn frá starfsmannaleigunni Mönnum í vinnu. Þar eru talin upp ýmis ummæli sem ég hef látið falla í fjölmiðlum um starfsemi fyrirtækisins. Ég er krafinn um afsökunarbeiðni og 1.000.000 í skaðabætur.“