Hera Björk Þórhalldsdóttir keppir í Söngvakeppninni næsta laugardagskvöld með lagið Moving On. Hera er búin að frumsýna myndband við lagið, sem leikstýrt var af Baldvini Z. Um er að ræða eina töku og er myndbandið vissulega táknrænt og í takti við boðskap lagsins.

„Þið eruð að fara að sjá mig. Nú nenni ég ekki að þykjast lengur. Við ætlum að mæta, við Herurnar, á svið og syngja um okkar samband í gegnum árin og hvernig við erum búnar að komast að samkomulagi um að taka frí frá hvor annarri þegar önnur okkar þarf á því að halda. Þetta er það sem ég er búin að vera að vinna í undanfarin ár – þetta innra samband sem maður á við sjálfan sig og stjórnar manni þegar maður tekur ákvörðun. Maður lætur stjórnast af sinni eigin neikvæðu rödd og hlustar á sína ljótu og niðurbrjótandi raddir. Það myndi enginn vinur, eða jafnvel ókunnugur, segja hluti við mann sem maður segir við sjálfan sig,“ segir Hera og heldur áfram. „Við ætlum að syngja af okkur rassgatið – það er það sem við gerum best. Ég er í raun að gera það sem ég trúi að sé það sem ég eigi að gera fyrir mig. Það er svolítið það sem ég er að bjóða þjóðinni – valkostinn mig í þessu góða partíi,“ sagði Hera í viðtali við DV fyrir stuttu.

Hér má sjá myndbandið frá Heru: