„Svona var Akureyrarkirkja útleikin eftir nóttina. Þar á að vera útför í dag,“ skrifar Svavar Alfreð Jónsson, sóknarprestur í Akureyrarkirkju á Facebook í morgun. Eins og sjá má á meðfylgjandi myndum hefur einhver lagt metnað sinn í að vinna skemmdarverk á kirkjunni í nótt. Búið er að rita alls kyns ókvæðisorð á veggi og hurð kirkjunnar.

Mbl.is greinir frá því að skemmdir hafi verið unnar á fjórum kirkjum á Akureyri í nótt.

Úðað var á þær hliðar sem ekki sjást frá götunni. „Þetta hefur verið gert í skjóli nætur,“ hefur RÚV eftir Svavari en úðabrúsinn fannst við kirkjuna þegar að var komið.

Veggjakrotarinn virðist ekki vera trúrækinn ef marka má boðskapinn sem birtist í skemmdarverkunum. „Religion is slavery“ og „God is a cunt“ er á meðal þess sem hann hefur skrifað.

Svavar segir að kirkjuvörður hafi gert lögreglu viðvart og að haft hafi verið samband við tryggingafélagið. Nú þurfi að hafa hraðar hendur því jarðarför eigi að fara fram í dag.