Árásin átti sér stað aðfaranótt 11. maí 2018 á heimili konunnar í Greve. René braut inn í hús konunnar um miðja nótt að sögn ákæruvaldsins. Hún var sofandi við hlið dóttur sinnar í svefnherberginu. René og konan þekktust áður en lögreglan hefur ekki viljað skýra frá tengslum þeirra.
Samkvæmt ákærunni sló René konuna í höfuð og líkama með „þungu höggvopni“. Hún hlaut fjölda beinbrota á handleggjum og fótum. Slagæð skaddaðist einnig og því telur saksóknari að René hafi ætlað að drepa konuna. Hann er einnig ákærður fyrir að hafa slegið 10 ára dóttur konunnar í andlitið, það telur ákæruvaldið vera „sérstaklega hættulega líkamsárás“.
Danska ríkisútvarpið segir að þegar málið kom upp á síðasta ári hafi lögreglan fljótlega beðið almenning um hjálp við að finna fatnað René en lögreglan taldi að hann hefði losað sig við fatnaðinn nærri heimili konunnar auk lambhúshettu og skópars.
René var handtekinn fyrir hádegi á árásardaginn og úrskurðaður í gæsluvarðhald næsta dag og hefur setið í gæsluvarðhaldi síðan. Þá ákvað dómari að ekki mætti skýra frá nafni hans opinberlega en það bann er nú fallið úr gildi þar sem búið er að gefa út ákæru. Málið verður tekið fyrir hjá undirrétti 6. mars.
René var kosinn í bæjarstjórn Greve haustið 2017. Hann er formaður skóla- og fræðsluráðs en hefur verið í leyfi frá störfum frá því um miðjan maí á síðasta ári. Hann er enn bæjarfulltrúi að nafninu til og getur haldið því embætti svo lengi sem hann er kjörgengur. Ef hann verður sakfelldur verður hann væntanlega sviptur kjörgengi. Hann neitar sök.
