Allir töldu að Jasmina Dominic hefði flutt að heiman fyrir 19 árum en hún hafði búið hjá foreldrum sínum í Króatíu. Nýlega fannst hún síðan á óvæntum stað og er óhætt að segja að það hafi komið flestum í opna skjöldu.

Jasmina var 23 ára þegar síðast sást til hennar í kringum aldamótin. En það var ekki fyrr en 2005 sem tilkynnt var um hvarf hennar til lögreglunnar.

Nýlega fannst hún síðan, það er að segja lík hennar, í frysti á heimili foreldra hennar í bænum Palovec. Króatískir fjölmiðlar skýra frá þessu. Það liggur því ljóst fyrir að hún yfirgaf æskuheimili sitt aldrei.

Systir hennar, Smiljana Srnec, býr nú í húsinu og hefur hún verið handtekin grunuð um að hafa orðið systur sinni að bana. Smiljana er þremur árum eldri en Jasmina.

Líkið fannst þegar fjölskyldan var að endurskipuleggja og endurnýja húsið.

Samkvæmt frétt Index hefur Smiljana viðurkennt að hafa orðið systur sinni að bana. Ástæða þess að líkið fannst ekki fyrr er að frystinum hafði verið komið fyrir undir stiga og því var ekki hægt að opna lokið á honum alveg til fulls og því var einfaldlega of erfitt að kíkja ofan í hann.

Telegram segir að Smiljana sé grunuð um að hafa villt um fyrir lögreglunni og systur sinni varðandi hvarf Jasmine fyrir 19 árum. Hún sagði að Jasmine hafi látið sig hverfa af fúsum og frjálsum vilja og hafi meira að segja verið í sambandi við sig síðar.

Lögreglan hafði áður leitað að Jasmine á og við heimilið en hafði greinilega ekki kíkt ofan í frystikistuna.