Fjölmargar sögur eru til af einstaklingum sem dóu en voru lífgaðir við og sögðu frá reynsu sinni af ljósinu margfræga. Heimsþekktar stjörnur hafa sagt sögur af slíkri reynslu. Hér eru frásagnir nokkurra þeirra.
Árið 2001 fékk Sharon Stone heilablóðfall og leið út af. Hún segist hafa verið böðuð ljósi og sá nokkra látna vini sína áður en hún komst aftur til meðvitundar. „Þetta gerðist allt ógnarhratt og allt í einu var ég komin aftur í líkamann.“ Það tók leikkonuna tvö ár að ná sér eftir hjartaáfallið, hún varð að læra að tala og ganga að nýju. Stone segist ekki lengur óttast dauðann. „Þegar dauðinn vitjar manns, eins og hann mun gera er það stórkostlegt og fallegt,“ segir hún.
Peter Sellers barðist við þunglyndi og var aldrei auðveldur í samskiptum. Hann fékk röð af hjartaáföllum, sum mjög alvarleg. Eftir eitt slíkt sagðist hann hafa farið út úr líkamanum og fylgst með læknunum á sjúkrastöfunni reyna að bjarga lífi hans. Hann sá engil sem sagði honum að ekki væri komið að honum að deyja. Sellers sagði að þau skilaboð hefðu valdið honum miklum vonbrigðum. Hann lést eftir hjartaáfall árið 1980.
Þriðji eiginmaður Elízabeth Taylor, kvikmyndaframleiðandinn Mike Todd, lést í flugslysi árið 1958. Nokkrum árum seinna veiktist leikkonan alvarlega og læknar úrskurðuðu hana látna. Hún sagðist í dauðareynslu sinni hafa séð göng, unfirfallegt ljós og Mike Todd sem sagði henni að hennar tími væri ekki kominn. „Ég vil vera hjá þér,“ sagði hún en hann sagði að hún yrði að fara til baka, sem og varð.
Jane Seymour veiktist alvarlega 36 ára gömul. Hún segist hafa farið úr líkamanum og séð hjúkrunarlið reyna að endurlífga sig. Hún sá líka sterkt hvítt ljós. Eftir þessa reynslu segist hún eftir öllum mætti reyna að lifa í núinu.
-Kolbrún Bergþórsdóttir
Birtist fyrst á DV.is
