Við bæinn Kennecott í Alaska í Bandaríkjunum var eitt sinn stærsta koparnámuvinnsla í heiminum. Þar voru unninn fleiri tonn af málmgrýti á ári hverju um margra ára skeið. En í dag er Kennecott aðeins minnisvarði um það sem áður var enda fór bærinn í eyði fyrir margt löngu.

Það var um aldamótin 1900 sem menn fundu geysimikla möguleika í koparvinnslu á svæðinu sem er býsna afskekkt. Alaska er víðfeðmt ríki og á hásléttum suðvesturhluta ríkisins, í Wrangell-St. Elias-þjóðgarðinum, stendur þessi afskekkti og yfirgefni bær í rúmlega tólf hundruð metra hæð yfir sjávarmáli.

Fleiri tugir timburbygginga voru reistar á hápunkti góðærisins í Kennecott og standa þær flestar enn þann dag í dag. Árið 1911 má segja að góðærið hafi byrjað og var lestarsamgöngum komið á milli Kennecott og annarra svæða í Alaska til að flytja þann kopar sem unninn var. Rúmum 30 árum síðar var búið að vinna nær allan þann kopar sem fannst á svæðinu og þá höfðu verðlækkanir á heimsmarkaði gert framleiðendum erfitt fyrir.

Svo fór að síðasta lestin fór í nóvember árið 1938. Síðan þá hefur Kennecott verið draugabær. Þó að svo sé er bærinn ekki með öllu yfirgefinn enda er hann vinsæll meðal ferðamanna og fjallgöngumanna. Þar sem bærinn er á minjaskrá bandarískra yfirvalda er hann friðaður og hafa framkvæmdir staðið yfir sem miða að því að varðveita þau hús sem reist voru á sínum tíma. Þá mun ferðamönnum gefast tækifæri til að fara í skipulagðar áætlunarferðir á svæðið.

Mynd: Henry Chen