Leikarinn Kirk Douglas fagnaði 100 ára afmæli sínu á dögunum. Á næsta ári stendur til að gefa út í bók ástarbréf hans og eiginkonu hans, Anne. Hún hefur geymt öll bréf sem þeim fóru á milli frá því þau kynntust.
Douglas hefur skrifað allnokkrar bækur, bæði endurminningar og skáldskap. „Ég var alltaf að tala um sjálfan mig,“ segir hann. Honum fannst komin tími til að konu hans væri getið og stakk upp á því við hana að þau legðu saman í bók. Bókin nefnist Kirk and Anne: Letters of Love, Laughter and a Lifetime in Hollywood. Hjónin hafa verið saman í 62 ár, giftu sig árið 1954 og eignuðust synina Peter og Eric. Douglas átti þá tvo syni af fyrra hjónabandi, Michael og Joel.
Sonur þeirra hjóna, Eric, lést árið 2004, 46 ára gamall af völdum eiturlyfja. Hann hafði snemma farið að vera til vandræða og varð háður eiturlyfjum. Foreldrar sendu hann margoft á dýrustu meðferðarstofnanir án árangurs. Eftir dauða hans heimsóttu foreldrar hans gröf hans tvisvar í viku. Nú eiga þau erfitt um gang, enda háöldruð, og fara ekki jafn oft.
Douglas er orðinn ansi hrumur, hann drafar og því er nokkuð erfitt að skilja hann. Hann segir einmanalegt að ná hundrað ára aldri því allir vinir hans séu látnir. „Ég á konuna mína og hún er á við fimm vini,“ bætir hann við.
