Blade Runner, Alien, Star Wars og allar hinar
Vísindaskáldsögur eiga upp á pallborðið hjá mörgum og á næsta ári mun talsverður fjöldi slíkra sagna rata á hvíta tjaldið, mörgum til skemmtunar og yndisauka. Breska blaðið Guardian tók saman lista yfir þær myndir sem margir eru hvað spenntastir fyrir.
Ridley Scott mun leikstýra þessu stórvirki sem kemur í kvikmyndahús næsta vor. Alien: Covenant gerist á undan Alien-myndunum og rétt eftir atburðina í Prometheus sem fékk blendin viðbrögð hjá gagnrýnendum og almenningi. Það verður spennandi að sjá hvað gerist í þessari nýju mynd sem verður frumsýnd vestanhafs í maí næstkomandi
Myndin segir frá líffræðingi sem leitar svara við dularfullum dauða eiginmanns síns sem lést í ótilgreindu umhverfisslysi. Leikstjóri er Alex Garland sem leikstýrði myndinni Ex Machina. Myndin skartar flottum leikurum og ber þar helst að nefna Natalie Portman, Jennifer Jason Leigh og Oscar Isaac.
Jóhann Jóhannsson semur tónlistina í þessari nýju mynd sem beðið er með mikilli eftirvæntingu. Harrison Ford er að sjálfsögðu á sínum stað en auk þess leika Ryan Gosling og Jared Leto í myndinni. Myndinni er leikstýrt af denis Villeneuve og gerist hún 30 árum eftir atburðina í fyrstu myndinni. Blade Runner 2049 er væntanleg í kvikmyndahús næsta haust.
Aðdáendur Stephen King eru margir spenntir fyrir þessari mynd enda er hún byggð á samnefndum bókaflokki rithöfundarins. Idris Elba og Matthew McConaughey fara með aðalhlutverkin í þessari epísku sögu. Leikstjóri myndarinnar er Daninn Nikolaj Arcel sem leikstýrði meðal annars myndinni A Royal Affair. Myndin verður frumsýnd um mitt sumar.
Geimurinn kemur nokkuð við sögu á hvíta tjaldinu á næsta ári og er Geostorm hluti af þeirri flóru. Myndinni er leikstýrt af Dean Devlin sem hefur komið að mörgum stórmyndum í gegnum árin, til að mynda Independence Day-myndunum og Godzilla. Myndin segir frá manni sem heldur út í geim til að koma í veg fyrir ógnarmikið óveður sem gervitungl framtíðarinnar geta myndað. Myndin er væntanleg í kvikmyndahús næsta haust.
Scarlett Johansson fer með aðalhlutverkið í þessari mynd sem byggð er á samnefndri japanskri teiknmyndasögu. Leikstjóri er Rupert Sanders og segir myndin frá deild innan lögreglu sem berst gegn netglæpamönnum. Myndin verður frumsýnd í Bandaríkjunum í mars.
Þó að nafnið bendi til annars er ekki um framhald King Kong Peters Jacksons að ræða frá árinu 2005, miklu frekar er um að ræða einskonar systurmynd Godzilla frá árinu 2014. Margir þekktir leikarar fara með hlutverk í myndinni, þeirra á meðal Tom Hiddleston, John Goodman, Brie Larson og Samuel L. Jackson.
Ryan Reynolds og Jake Gyllenhaal fara með aðalhlutverkin í þessari framtíðarmynd sem segir frá geimförum sem halda til Mars. Þar rekur dálítið óvænt á fjörur þeirra sem gæti hleypt framtíð mannkyns í mikla hættu. Leikstjóri myndarinnar er Daniel Espinosa og verður myndin frumsýnd í mars næstkomandi.
Aðdáendur Star Wars-myndanna eru að upplifa góða tíma um þessar mundir og á næsta ári, rétt fyrir jólin, fá aðdáendur þriðju myndina á þremur árum. Rian Johnson leikstýrir myndinni sem er hans langstærsta verkefni til þessa. Þess má til gamans geta að hann leikstýrði þremur þáttum af Breaking Bad á sínum tíma.
