Sven Jacobi, þýskur framkvæmdastjóri og stofnandi Neo Advertising í Hamborg, er nýr eigandi 1900 hektara lands í Hellisfirði á Austfjörðum í gegnum félagið Vatnsstein ehf. Samkvæmt fyrirtækjaskrá er tilgangur félagsins eldi og ræktun í ferskvatni.

Greint er frá þessu í Austurfrétt.

Jörðin var áður í eigu félags Sigurjóns Sighvatssonar, sem keypti hana árið 2000, en jörðin var auglýst til sölu í sumar og gengið frá kaupunum síðasta haust.

Jacobi fundaði ásamt lögmanni sínum með bæjarstjórn Fjarðabyggðar í gærmorgun þar sem farið var yfir ætlanir hans með jörðina, en Jacobi vildi ekki veita viðtal um áform sín að svo stöddu, en samkvæmt Austurfrétt bárust upplýsingar um að fyriráætlunum hans yrði nánar greint frá með vorinu.

Fyrirtæki Jacobi rekur stóra auglýsingaskjái sem sjá má á flugvöllum, stórmörkuðum og verslunarmiðstöðvum og er fyrirtækið með skrifstofur í fimm löndum. Meðal viðskiptavina þess er Unilever, L‘Oreal og Edeka, en Jacobi er sagður frumkvöðull í markaðsmálum í Þýskalandi.

Hellisfjörður hefur verið í eyði frá 1952. Þar var rekin norsk hvalveiðistöð milli 1901-1913 og enn má sjá minjar þar um. Enginn vegur liggur til Hellisfjarðar og þangað verður að fara með bát eða á tveimur jafnfljótum, frá Norðfirði.

Bærinn Hellisfjörður var í botni fjarðarins sjálfs, og á jörðinni stendur sumarhús sem byggt var árið 1970. Þar er hægtað veiða silung og fugl, einkum í ósi Hellisfjarðarár.