Opinberuðu samband sitt á Instagram í morgun
Tónlistarmennirnir Jennifer Lopez og Drake virðast hafa staðfest orðróm þess efnis að þau séu meira en bara vinir. Það gerðu þau með því að birta mynd af sér á Instagram í morgun sem sýnir þau í innilegu faðmlagi. Nokkur aldursmunur er á parinu. Lopez er 47 ára en Drake, sem er einn þekktasti rappari heims um þessar mundir, er 30 ára.
Það eru ekki miklar líkur á að fyrrverandi kærasta Drake, Rihanna, sjái innleggið þar sem hún henti honum út af vinalistanum sínum um helgina.
Lopez sem er tveggja barna móðir birti myndina fyrst á sinni Instagram síðu. Skömmu síðar var hún einnig komin á Instagram síðu Drake. Frá því að myndin birtist hafa aðdáendur þeirra keppst um að „læka“ og skrifa fögur orð um þetta nýja ofurstjörnupar.
Nokkuð hefur verið slúðrað í Hollywood síðustu vikur um hvort Drake og Lopez hafi verið að stinga saman nefjum en Drake mætti með henni á tvenna tónleika sem hún hélt í Vegas fyrr í mánuðinum. Þá hafa þau sést saman á veitingahúsum í Los Angeles og víðar.
