Sigmundur Davíð Gunnlaugsson fyrrverandi forsætisráðherra og þingmaður Framsóknarflokksins hefur verið valinn maður ársins af hlustendum Útvarps Sögu.
„Þetta er í 14 skipti sem við útnefnum mann ársins en sá síður hefur haldist hjá mörgum fjölmiðlum undanfarin ár,“ segir útvarpsstjórinn Arnþrúður Karlsdóttir.
Segir Arnþrúður að ný tegund fjölmiðlunar leika stærra hlutverk á samfélagsmiðlum og í athugasemdarkerfum. Þá segir hún Ríkisútvarpið hafa staðið fyrir árás á Sigmund sem sagði af sér sem forsætisráðherra eftir umfjöllun um Panamaskjölin.
„Fjölmiðlar eiga ekki að láta falda valdið á Íslandi ráða því hverjir eru teknir fyrir og hverjir sleppa við umræðuna. Það er vont til þess að vita að menn í nafni blaðamennsku setjir sér þau markmið að ganga frá einstaklingum, ætli sér að rústa mannorði og lífi viðkomandi um alla framtíð, Taka menn úr umferð og taka menn niður eins og það er kallað, já og ganga frá viðkomandi. Jafnvel gera slíkir blaðamenn kröfu til þess að verða heiðraðir og hljóta blaðamannaverðlaun, allt í nafni rannsóknarblaðamennsku.“
Sigmundur Davíð hefur einnig hjólað í Ríkisútvarpið sem og í sænska fjölmiðlamanninn Sven Bergman í langri grein í Morgunblaðinu. Starfsmenn Kastljós og Reykjavík Media svöruðu forsætisráðherranum fyrrverandi fullum hálsi og sökuðu hann um endurteknar rangfærslur. En Sigmundur á bandamann í Arnþrúði sem segir einnig:
„Sá sem hefur hvað mest mátt þola ósvífni af hálfu fjölmiðla og nefmiðla á árinu 2016 er maður ársins á Útvarpi Sögu. Maður ársins er Sigmundur Davíð Gunnlaugsson fyrrum forsætisráðherra.“
Heldur Arnþrúður fram að Sigmundur hafi fengið að líða fyrir það að berjast fyrir þjóð sína gegn Icesave og ögrað fjármálaöflum á ýmsa lund.
„Hann hefur sýnt og sannað að hann vill þjóð sinni vel og vék til hliðar úr stóli forsætisráðherra til þess að skapa frið í þjóðfélaginu. Sigmundur Davíð varð fyrir aðför að hálfu ríkisútvarps allra landsmanna og í raun var það aðför að stjórnkerfi landsins,“ segir Arnþrúður enn fremur:
„Allt kom fyrir ekki. Stjórnarandstaðan vildi kosningar og fékk þær en ekki vildi betur til en svo að það hefur ekki enn þá verið hægt að mynda ríkisstjórn í lok árs 2016.“
