Kristín Soffía Jónsdóttir, borgarfulltrúi Samfylkingarinnar, sagði í Morgunútvarpi Rásar 2 að listaverkið Pálmar, sem valið var sigurvegari alþjóðlegrar hugmyndasamkeppni um listfegrun Vogabyggðar og kosta á um 140 milljónir, verði að öllum líkindum endurskoðað út frá raunhæfni.

Verkið felst í innflutningi tveggja pálmatrjáa, sem hýst verða í upphituðum glerhólkum, allt árið um kring.

„Það verður að leggja mat á raunhæfni þessa verkefnis. Það er staðreynd. Við förum ekki af stað, ekki þarna frekar en annarsstaðar, í myrkri.”

Hún bar því við að meirihlutinn hafi ekki verið upplýstur um störf dómnefndar, en formaður dómnefndar var Hjálmar Sveinsson, borgarfulltrúi Samfylkingarinnar.

Ekki liggur fyrir hvernig endanleg útfærsla verður á verkinu, hver rekstrarkostnaðurinn er eða hver eigi að sjá um viðhaldið. Sagði Kristín að auðvitað yrði ekki haldið áfram með verkið ef það teljist ekki raunhæft til útfærslu og benti á að engir garðyrkjufræðingar hefðu verið í dómnefndinni og ákvörðunin því einungis tekin út frá listrænum sjónarmiðum, en ekki praktískum:

„Þetta er djörf tillaga og á að vekja umræðu. Svo þarf kannski að gera breytingar. Höldum ekki áfram með eitthvað sem eitthvað sem er tæknilega ómögulegt,”

sagði Kristín og minntist á að þverpólitísk sátt hefði náðst um þá ákvörðun á sínum tíma, að verja 150 milljónum í útilistaverk í hverfinu, sem kosti alls um sex milljarða.

Samkvæmt stefnu yfirvalda ber að verja einu prósenti heildarkostnaðar til listfegrunar opinberra bygginga.

Eyþór Arnalds var einnig til viðtals í Morgunútvarpinu og gagnrýndi hann ákvörðunina. Sagði hann ótækt að verja ætti tífalt þeirrar upphæðar sem Reykjavíkurborg ver árlega til listaverkakaupa, í eitt verk. Nefndi hann að þó svo borgin greiði aðeins helming upphæðarinnar, og eigendur lóðarinnar hinn helminginn, muni þetta allt koma á endanum úr vösum borgarbúa, því innviðagjaldið hækki íbúðaverðið og geri þær illseljanlegri.

Höfundur verksins er þýska listakonan Karin Sander, sem fékk greiddar um 14,8 milljónir fyrir hugmyndina. Sjálf kosta pálmatrén tvö alls 1,5 milljónir en glerhjúparnir tveir umhverfis pálmatrén munu kosta 43 milljónir hver.