Lögreglan í Bretlandi gaf það út á fimmtudaginn að hætt væri að leita að framherjanum Emiliano Sala og flugmanninum Dave Ibbotson.

Sala og Ibbotson voru um borð í flugvél í síðustu viku sem hvarf skyndilega á leið sinni frá Nantes til Cardiff. Eftir 72 klukkutíma leit þá gafst lögreglan upp sem varð til þess að fjölskylda Sala bað almenning um hjálp.

Fjölmargir knattspyrnumenn hafa kallað eftir því að leitinni verði haldið áfram og þar á meðal Lionel Messi, leikmaður Barcelona.

Um helgina tókst að safna 300 þúsund evrum sem eru meira en 30 milljónir króna. Leit fór aftur af stað í gær. Leikmenn eins og Demaray Gray hjá Leicester, Ilkay Gundogan hjá Manchester City og Corentin Tolisso hjá Bayern Munchen hafa styrkt málefnið.

Sala hafði skrifað undir hjá Cardiff en félagið keypti hann frá Nantes, framherjinn fór aftur til Frakklands til að sækja eigur sínar og var á leið á sína fyrstu æfingu með Cardiff, þegar vélin hvarf.

,,Þetta hefur haft meiri áhrif á mig en aðra, ég hafði verið að tala við Sala í sex til átta vikur,“ sagði Neil Warnock, stjóri Cardiff um málið. Félagið hafði lagt mikið á sig til að fá framherjann.

,,Ég kallaði hann alltaf Emile, ég sagði honum að ég gæti ekki borið fram nafnið hans. Minningarnar sem ég hef frá honum eru að hann lofaði mér að skora mörk fyrir mig, ég sagði alltaf við hann að ég vissi að svo væri.“

Sala skrifaði undir hjá Cardiff á laugardegi, sama dag og liðið var að spila fyrir Newcastle. ,,Ég bauð honum til Newcastle, ég hugsa oft um það. Hann vildi fara til Frakklands og hitta vini sína og taka eigur sínar.“

,,Ég hef ekki getað sofið, ég hef verið í fótbolta í 40 ár en þetta er það erfiðasta á ferlinum.“