„Ég hef ekki sofið vel síðan hann var kjörinn,“ segir Madonna í nýlegu viðtali við Billboard-tímaritið og á þar við Donald Trump. Hún segist vakna á hverjum morgni og byrja á því að átta sig á að kjör Trumps var ekki bara vondur draumur. Hún segir að þær konur sem kusu Trump hafi svikið kynsystur sínar. „Konur hata konur,“ segir Madonna. „Það er ekki í eðli kvenna að styðja aðrar konur. Það er mjög dapurlegt. Karlmenn vernda hverjir aðra og konur vernda menn sína og börn.“ Hún segir að með kjöri Trumps hafi Bandaríkin orðið að athlægi um allan heim. „Við erum þess ekki lengur umkomin að gagnrýna ríkisstjórnir annarra landa og leiðtoga þeirra.“
Madonna segist aðspurð hafa hitt Trump fyrir mörgum árum. Hún lýsir honum sem vingjarnlegum manni með persónutöfra hinnar roggnu karlrembu. Hún segir að þá hafi hún haft gaman af hversu lítið hann var gefinn fyrir pólitískan rétttrúnað en bætir við: „Auðvitað vissi ég ekki að hann ætti eftir að fara í forsetaframboð tuttugu árum síðar. Fólk eins og hann er til. Það er í lagi mín vegna. En fólk af þessari gerð á ekki að geta orðið þjóðhöfðingjar.“
