Hagnaður útgáfufélagsins Mylluseturs ehf., sem á og rekur Viðskiptablaðið og tengda fjölmiðla, nam ríflega tíu milljónum króna á árinu 2015 og minnkaði um liðlega 3,5 milljónir frá fyrra ári, að því er fram kemur í nýbirtum samandregnum ársreikningi félagsins. Allt frá 2010 hefur starfsemi félagsins skilað hagnaði á hverju einasta rekstrarári.

Samkvæmt ársreikningi Mylluseturs námu eignir félagsins um 140 milljónum króna í árslok 2015. Eigið fé er 49 milljónir og eiginfjárhlutfall félagsins er því um 35%. Eignir Mylluseturs eru að langstærstum hluta útistandandi viðskiptakröfur, en þær voru liðlega 109 milljónir í lok síðasta árs. Heildarskuldir eru um 54 milljónir króna og minnkuðu um fimmtán milljónir frá fyrra ári.

Eigendur útgáfufélagsins eru Pétur Árni Jónsson með 67 prósenta hlut og Sveinn Biering Jónsson með 33 prósenta hlut. Pétur Árni lét af störfum sem útgefandi blaðsins í febrúar á þessu ári og var staðan samtímis lögð niður. Þá hætti hann sömuleiðis sem eini stjórnarmaður félagsins og tók Jón Sigurðsson, framkvæmdastjóri Mylluseturs og faðir Péturs Árna, sæti hans í stjórninni. Skömmu síðar var tilkynnt um ráðningu Péturs Árna sem framkvæmdastjóra hjá fasteignafélaginu Heild sem er í eigu tveggja fjárfestingarsjóða í stýringu Gamma Capital Management.