Þetta setti mikinn þrýsting á taílensk yfirvöld sem leyfðu henni í kjölfarið að koma inn í landið og síðan blandaði Flóttamannastofnun Sameinuðu þjóðanna sér í málið og hvatti ríki heims til að veita Rahaf hæli. Kanadísk stjórnvöld brugðust fljótt við þessari beiðni og buðu henni hæli og kom Rahaf til Kanada um helgina.
Í umfjöllun Daily Mail um málið kemur fram að Rafah sé strax farin að tileinka sér lífsstíl Kanadabúa því hún hafi fengið sér beikon í morgunmat en það var í fyrsta sinn sem hún borðaði beikon. Hún klæðir sig einnig „frjálslega“ á sádi-arabískan mælikvarða því hún mætti á fréttamannafund í hnésíðum kjól en í Sádi-Arabíu verða konur að hylja sig frá toppi til táar og mega alls ekki láta sjást í bert hörund utan heimilisins.
Rahaf hefur verið iðin við að birta myndir á samfélagsmiðlum af nýja lífinu sínu í Kanada og því frelsi sem hún nýtur þar, eitthvað sem hún þekkti ekki í Sádi-Arabíu. Á þriðjudaginn birti hún mynd af morgunmat sínum og fagnaði því að fá beikon og egg. Hún hefur einnig birt mynd af Starbucks kaffibolla í kjöltu hennar þar sem sést í bera leggi hennar.
Costi Immigrant Service hefur verið falið að aðstoða Rahaf fyrir hönd stjórnvalda. Rahaf er í Toronto og nýtur sólarhringsöryggisgæslu því henni hafa borist margar líflátshótanir og eru þær teknar mjög alvarlega.
Talsmaður Costi sagði að hótanirnar hafi ekki farið framhjá Rahaf. Hún hafi sagt skilið við íslamstrú og hafi í raun náð að brjóta sér leið frá fjölskyldu sinni og þessar breytingar hræði hana.
Á fréttamannafundi á þriðjudaginn þakkaði Rahaf kanadískum og taílenskum stjórnvöldum sem og Flóttamannastofnun Sameinuðu þjóðanna fyrir aðstoðina.
„Ég veit að ég er ein þeirra heppnu. Ég veit að það eru til óheppnar konur sem hurfu eftir að hafa reynt að flýja eða gátu ekki gert neitt til að breyta stöðu sinni.“
Sagði hún og bætti við að hún vilji helga líf sitt baráttunni fyrir frelsi kvenna um allan heim.
„Frelsi eins og ég fann um leið og ég kom til Kanada.“
En fyrsta verkefni hennar er þó að læra ensku sagði hún.
