Gary Neville sérfræðingur Sky Sports og fyrrum fyrirliði Manchester United segir að félagið eigi ekki að leyfa þjálfurum að koma inn með sína hugmyndafræði hjá félaginu. Sá kafli sé á enda.

Eftir að Sir Alex Ferguson hætti árið 2013 hefur félagið farið í þrjár mismunandi áttir og hefur það ekki borið árangur.

Ole Gunnar Solskjær stýrir liðinu nú og hefur leitað í bækur Sir Alex Ferguson, það hefur virkað hingað til. Liðið hefur unnið alla sex leikina með hann í starfi

David Moyes, Louis van Gaal og Jose Mourinho hafa verið reknir á síðustu árum.

,,Manchester United á aldrei að leyfa neinum að koma aftur inn á Old Trafford og á æfingasvæðið, með sínar hugmyndir. Það er búið,“ sagði Neville.

,,Hugmyndafræði Manchester United nær svo langt, þetta er eins og Barcelona og Ajax. Hjá Manchester United, spilar þú hratt, sóknarbolta og reynir að skemmta fólki. Þú kemur ungum leikmönnum að og gefur þeim trú, þú vinnur titla.“

,,Þriðji hluturinn kemur í kjölfar fyrstu tveggja, ef þú gerir þá rétt. Þú vinnur ekki alltaf, stundum koma ár þar sem þú vinnur ekki titla.“

,,Ég studdi við bakið á Moyes, Van Gaal og Jose Mourinho. Ég taldi að þeir myndu gera þetta hjá United, ég sit ekki hérna núna og gagnrýni ákvörðun félagsins að ráða Jose Mourinho. Ég taldi það vera fullkomið, hann hafði alltaf mætt og unnið. Hann vann titla á fyrsta tímabili, ég hélt að hann myndi vinna deildina.“