Jurgen Klopp, stjóri Liverpool hefur lengi verið á meðal þeirra bestu í faginu. Á næstu mánuðum gæti hann skrifað nafnið sitt í sögubækur Liverpool. Liði er á toppi ensku úrvalsdeildarinnar og gæti unnið deildina í fyrsta sinn í 29 ár.

Klopp var áður stjóri Borussia Dortmund og árið 2014 var hann að velta því fyrir sér að kaupa Sadio Mane frá RB Salzburg. Þeir funduðu en Klopp hætti við kaupin.

Þetta segir Klopp að séu ein stærstu mistök hans á ferlinum, Mane fór til Southampton og þaðan til Liverpool. Þar vinnur hann nú með Klopp og blómstrar.

,,Ég hef gert nokkur mistök í lífinu og ein af þeim stærstu er að hafa ekki keypt Sadio Mane þegar ég var hjá Dortmund,“ sagði Klopp.

,,Við vorum saman á skrifstofu minni að tala saman, eftir þann fund, var ég efins um að kaupa hann. Það voru mistök hjá mér.“

,,Hann er magnaður drengur, lífið gaf mér annað tækifæri til að vinna með honum. Vonandi nýtum við það báðir vel.“