Það eru líklega ekki margir sem væru sáttir við að fá vændishús í næsta nágrenni við heimili sitt og hvað þá ef það væri í raðhúsinu við hliðina. Það má eflaust reikna með ákveðnu ónæði af slíkri starfsemi og þess utan hlýtur það að draga úr sölumöguleikunum á húsum í nágrenninu.

En Erik Brogaard, sem hefur búið í útjaðri Ølgod á Jótlandi í Danmörku undanfarin 26 ár, kippir sér ekki mikið upp við að í raðhúsinu, sem er áfast húsi hans, er vændishús rekið og hefur verið síðustu tæpu tvo áratugi.

Eriki keypti húsið fyrir smotterí 1993 og er bara sáttur við sitt þrátt fyrir þessa óvenjulegu „atvinnustarfsemi“ í næsta húsi. Þegar nýr eigandi fékk húsið við hliðina fékk Erik að vita að þar yrðu stúlkur og vissi hann um leið hvað átt var við. Síðan þá hefur ljósaskilti með rauðum stöfum sýnt orðið „Open“ allan sólarhringinn alla daga ársins.

„Ég hafði aldrei neitt á móti því að fá vændishús þarna.“

Sagði Erik í samtali við JydskeVestkysten. Hann er nú á eftirlaunum og nýtur tilverunnar með hundinum sínum og nágrannarnir og starfsemi þeirra truflar hann ekki.

„Ég held að ég geti ekki selt húsið og það tengist vændishúsinu ekki neitt. Ég hefði hvort sem er ekki getað selt það. Það er umferðarþungur vegur við hliðina, háspennulínur og spennistöð í nágrenninu og maður fær ekki lán fyrir húsum hér.“

Hann segir að reksturinn við hliðina sé nú örugglega ekki nein gullnáma. Skipt hafi verið einu sinni um eigendur eftir að sá fyrri fór á hausinn og húsið var selt á uppboði. Erik segist ekki fygljast með aðsókninni að vændishúsinu en kemst samt sem áður ekki hjá því að vita aðeins hvað er á seyði þar því stofuveggurinn hans er það eina sem aðskilur húsin.