National Geographic frumsýndi í vikunni nýja heimildarmynd um loftslagsbreytingar og afleiðingar þeirra. Myndin, sem ber heitið Before the Flood, er aðgengileg á netinu án endurgjalds.

Bandaríski stórleikarinn Leonardo DiCaprio er einn þeirra sem hefur veg og vanda af gerð myndarinnar. DiCaprio hefur lengi látið sig náttúruvernd varða og stofnaði hann sjóð fyrir tæpum tuttugu árum, Leonardo DiCaprio Foundation, sem hafa meðal annars það markmið að vekja fólk til umhugsunar um umhverfis- og auðlindamál.

Myndin sem um ræðir er 90 mínútur að lengd og hefur hún fengið góða dóma hjá gagnrýnendum.

„Ég vil vita hversu langt við erum komin, hversu mikilli eyðileggingu við höfum valdið og hvort það sé eitthvað sem við getum gert til að stöðva þessa þróun,“ segir DiCaprio meðal annars í byrjun myndarinnar. Meðal þeirra sem rætt er við í myndinni eru, auk Barack Obama Bandaríkjaforseta, nafntogaðir einstaklingar á borð við Elon Musk, stofnanda Tesla, Frans páfa, Ban Ki-Moon, aðalritara Sameinuðu þjóðanna, Bill Clinton fyrrverandi Bandaríkjaforseta og mexíkóska leikstjórann Alejandro G. Inarritu.

Myndina má horfa á í heild sinni hér að neðan.