Braggamálið svokallaða hefur verið í fjölmiðlum undanfarna mánuði og skapaði fjaðrafok innan borgarstjórnarinnar í Reykjavík. Búið er að eyða 425 milljónum króna af skattpeningum borgara Reykjavíkur í að byggja bragga undir veitingastað og félagsmiðstöð fyrir stúdenta Háskólans í Reykjavík. Bragginn var upprunalega byggður í síðari heimsstyrjöld og var hann hluti af hóteli. Hótelið brann svo og lá undir skemmdum í fjölmörg ár.
Fram kom í fréttatilkynningu haustið 2015 að bragginn væri hluti af metnaðarfullri áætlun Háskólans í Reykjavík um að byggja upp nýsköpunargarð að erlendri fyrirmynd. Vinna átti verkið í samráði við stúdenta HR og hafa þar félagsaðstöðu, veitingasölu stúdenta og aðstöðu fyrir sprotafyrirtæki. Dagur B. Eggertsson borgarstjóri sagði við undirritun samninganna á sínum tíma: „Ástæðan fyrir því að borgin vill leggja þessu lið er að við viljum að borgin sé spennandi staður, þar sem verða til nýjar hugmyndir og ný fyrirtæki og þetta verkefni passar mjög vel inn í þá mynd.“ Upprunalega átti að verja 158 milljónum í verkefnið.
Dagur B. Eggertsson, borgarstjóri Reykjavíkur, hefur ítrekað í viðtölum við fjölmiðla talað um að um minjavernd væri að ræða þegar hann er spurður út í braggamálið. Minjavernd ríkisins hins vegar taldi ekki að bragginn myndi falla undir lög um minjavernd og var því ekki um minjavernd að ræða þegar bragginn var gerður upp. Einnig kemur fram í skýrslu Innri endurskoðunar að það hafi verið eftir hentugleika arkitekts verkefnisins hvað ætti að varðveita og hvað ekki. DV hefur í meira en tvo mánuði beðið um heildarlista yfir þau verkefni sem borgin flokkaði undir kostnað vegna verndunarsjónarmiða, en heildarkostnaður vegna þess var 71 milljón.
Enn hefur DV ekki borist listi yfir þessi verkefni og er ástæðan fyrir því, að sögn Bjarna Brynjólfssonar, upplýsingarstjóra Reykjavíkurborgar, sú að skrifstofa eigna og atvinnuþróunar Reykjavíkurborgar hefur ekki enn svarað beiðni hans um að fá fullan lista. Sama skrifstofa tók sér meira en ár í að svara borgarlögmanni og afhenda honum gögn varðandi skoðun hans á braggamálinu.
Framkvæmdum við braggann er ekki enn lokið en forseti borgarstjórnar gaf það út 11. október að borgarbúar myndu ekki greiða krónu í viðbót í braggann. Samkvæmt leigusamningi á milli Háskólans í Reykjavík og Reykjavíkurborgar er talað um að leigan eigi við fullbúið húsnæði. DV óskaði eftir reikningum fyrir leigu á húsnæðinu sem Reykjavíkurborg sendi á Háskólann í Reykjavík þann 20. desember síðastliðinn, enn hefur ekki borist svar frá Reykjavíkurborg vegna þeirrar fyrirspurnar.Samkvæmt skýrslu Innri endurskoðunar Reykjavíkurborgar er augljóst að nánast allt hafi farið úrskeiðis varðandi þessa framkvæmd og sýndi skýrslan hversu auðvelt það er fyrir borgarstarfsmenn að brjóta bæði lög og reglur í starfi og eyða hundruðum milljónum króna skattgreiðenda án þess að bera nokkra ábyrgð á mistökum sínum.
Skipaður hefur verið hópur sem á að fara yfir tillögur Innri endurskoðunar um hvernig koma eigi í veg fyrir að svona nokkuð geti gerst aftur innan stjórnsýslu borgarinnar. Mun Dagur B. Eggertsson leiða þá vinnu. Hafa borgarfulltrúar minnihlutans bent á að það sé afar óheppilegt að Dagur leiði þá vinnu þar sem hann var meðal annars yfirmaður Hrólfs Jónssonar, ásamt því að hann hafi ekki brugðist neitt við ábendingum Innri endurskoðunar frá árinu 2015.
