Jólageit IKEA á ekki sjö daganna sæla í aðdraganda hátíðanna og ljóst er að hópur einstaklinga í þjóðfélaginu hugsar henni þegjandi þörfina. Geitin hefur ítrekað verið brennd til kaldra kola undanfarin ár og tveir pörupiltar höfðu slíkt í hyggju í gærkvöldi þegar þeir nálguðst geitina með einhverskonar blys í hönd. Nútíminn greinir frá

Í myndbandi úr öryggismyndavél frá IKEA þá má sjá mennina nálgast geitina en á afar klaufalegan hátt tekst þeim að klúðra ætlunarverkinu gjörsamlega. Segja má að þeir hafi verið nær því að kveikja í sjálfum sér heldur en nokkurn tímann geitinni. Afleiðingar prakkarastriksins urðu þær að það kviknaði í runna einum sem skíðlogaði. Piltarnir hlupu síðan á brott og náðust ekki.

Í frétt Nútímans kemur fram að geitin sé vöktuð með öryggismyndavél allan sólarhringinn. Þá er þeirri árlegu samsæriskenningu velt upp að starfsfólk IKEA voni að kveikt verði í geitinni enda sé það afar góð auglýsing fyrir verslunina. Þ „Það er einlæg von okkar að geitin fái að standa á sínum stað fram yfir jól,“ segir Guðný Camilla Aradóttir, umhverfis- og markaðsfulltrúi IKEA, og vísar þar með samsæriskenningum til föðurhúsanna.

Sjáðu myndbandið.