Verðlaunahátíðin Golden Globes fer fram þann 6. janúar næstkomandi og nýverið var kokteill verðlaunahátíðarinnar opinberaður. Kokteillinn heitir Moët Belle og var búinn til af leikkonunni Camilla Belle, sem er hvað þekktust fyrir leik í When a Stranger Calls, 10.000 BC og Push.

Drykkurinn er innblásinn af brasilískum uppruna leikkonunnar og búinn til úr Cachaca, áfengi úr sykurreyrssafa, mangósafa, engiferssírópi, súraldinsafa og kampavíninu Moët & Chandon, sem hefur verið kampavín hátíðarinnar síðustu 28 árin.

Golden Globes-hátíðin er þekkt fyrir að vera sú hátíð í stjörnuheimum þar sem fræga fólkið drekkur sem mest, en margir muna eflaust eftir því þegar að leikkonan Emma Thompson afhenti verðlaun árið 2014 með hælaskóna í annarri hendi og martini-drykk í hinni.

Maturinn verður hins vegar léttur á hátíðinni og boðið upp á steinbít með svörtum hrísgrjónum og grænmeti í aðalrétt og hveitilausa súkkulaðiköku í eftirrétt. Kokteillinn verður í lykilhlutverki á hátíðinni en hér á eftir fylgir uppskriftin.

Moët Belle

Hráefni:

30 ml Cachaca
22 ml mangósafi
15 ml engifersíróp
7,5 ml ferskur súraldinsafi
75 ml Moët & Chandon Brut Impérial kampavín
æt blóm til skreytingar

Aðferð:

Hristið fyrstu fjögur hráefnin saman með ísmolum. Hellið í glas í gegnum síu og toppið með kampavíninu. Skreytið með ætum blómum og berið fram.