Eftir áramót verða allir Íslendingar sjálfkrafa líffæragjafar nema óski sérstaklega eftir öðru. Óhætt er að segja að langflestir fagni þessu en þó er hávær minnihluti sem er uggandi yfir þessu. Bæði á Facebook og í athugasemdum fjölmiðla er því mótmælt harðlega ríkið muni „hirða úr manni það sem þeir vilja“.

Sjá einnig: Íslendingar sem vilja ekki gefa líffæri þurfa að skrá sig

Vísir greindi í gær frá því að allir Íslendingar yrðu sjálfkrafa líffæragjafar og hlaut deiling þeirrar fréttar óvenju mörg læk, ríflega fjórtánhundruð. Ylfa nokkur skrifaði þó athugasemd við þá færslu sem hefur vakið nokkra athygli en þar mótmælir hún því að nokkur fái sín líffæri. „ Djöfulsins BANDÍTTARNIR. Það er ekki nóg að þeir EIGI OKKUR Í LIFANDA LÍFI og rúi okkur inn að skinni, heldur vilja þeir nú halda áfram að NOTA OKKUR ,ÞEGAR VIÐ ERUM DAUÐ. Ekki er svo mikið sagt sem svei þér. Bara skikkaðar út tilkynningar og lækna glæponarnir róa að þessu öllum árum. Ég ætla a.m.k. ekki að hlýða þessum bölvuðum frekjum og það fær enginn MÍN LÍFFÆRI OG LÍKAMA til að krukka í að gamni sínu,“ skrifar Ylfa.

Henni var bent á að það væri lítið mál að óska eftir því að líffæri hennar yrðu ekki gefin. Hún tók það ekki í mál. „Með því móti myndi ég viðurkenna rétt einhverra pólitíkusaglæpamanna, til að ráðskast með mig og það mun ég aldrei gera. Ég er síður en svo á móti því að hjálpa fólki, en ég ætla ekki að láta neinn ÞVINGA mig til þess. Það sem þið AULARNIR sem skrifið hér að ofan ekki sjáið, er að þessi tilskipun, gefur hvaða læknaskepnu sem er, færi á að úrskurða ykkur LÁTIN, til að geta notað úr ykkur líffærin,“ skrifar Ylfa.

Hún er þó fjarri lagi sú eina sem mótmælir þessum áformum. „Er maður semsagt þjóðnýttur eins og kjöt í kæliborði eftir dauðan nema maður standi í pappírsstússi?,“ spyr Sigþór nokkur í athugasemd við frétt Vísis. Þorsteinn nokkur segir sömuleiðis: „Andskotans bull þeir eiga ekki að geta krukkað í manni nema með leyfi.“

Innan Facebook-hópsins Stjórnmálaspjallið er hópur manns sem mótmælir þessu en flestir virðast mótmæla þessu á grundvelli þess að ríkið eigi ekki líkama borgara. „Ísland fer að líkjast Norður-Koreu meira og meira með hverju árinu… það sorglegasta við þessa ríkisafskiptastefnu er það að margir vilja hafa hlutina svona… ríkið eigi að segja hvað má og hvað má ekki alla daga… frelsi okkar er verið að skerða í hvert sinn sem ný lög eru sett,“ skrifar Ingibjörg nokkur. Magnús nokkur tekur undir og segir: „Ef þessir ríkisdrullusokka hirða úr manni það sem þeir vija þá er þeirra að borga jarðarförina þetta er bara bisnes“.

Þessi hörðu viðbrög sumra Íslendinga hefur vakið kátínu á Twitter en Donna Cruz, fyrrverandi keppenda í Ungfrú Ísland 2016, segir til að mynda að þetta sé oft sama fólkið og mótmælir fóstureyðingum.

Skemmtilegt að sjá hvað fólk er brjálað yfir því að Íslendingar verði sjálfkrafa líffæragjafar eftir áramót ?

Sama fólk sem neitar konum þungunarrofi finnst allt í einu skandall að ríkið hafi eitthvað að segja um líkama þeirra ???

— Donna cruz (@Donneunice13) December 27, 2018