Hinn vinsæli en umdeildi breski heimildamyndagerðarmaður Adam Curtis segir að hefðbundnum heimildamyndum hafi hreinlega mistekist að útskýra hinn ofurflókna samtíma okkar fyrir áhorfendum, skáldskapur sem notast við heimildir sé mun gagnlegri til að varpa ljósi á raunveruleikann. Þetta segir hann í viðtali við breska dagblaðið The Guardian um stöðu heimildamyndarinnar.

Curtis nefnir til dæmis kvikmyndir á borð við The Big Short og American Honey, og þáttaraðirnar This is England og South Park sem dæmi um verk sem varpi nýju ljósi á veruleikann – en síðastnefndu þættina segir hann vera tæra snilld.

„Öll þessi verk snúast um að sýna fólki raunveruleikann, en þau gera það á óvæntan og hugvitsamlegan hátt. Þau bjóða þér að horfa á heiminn á nýjan hátt, á meðan hefðbundnar heimildamyndir virðast sitja fastar,“ segir Curtis sem nýlega sendi frá sér heimildamyndina HyperNormalisation á BBC.