IKEA-geitin við Kauptún í Garðabæ brann nánast til kaldra kola í nótt eftir að eldur var borinn að henni. Tilkynnt var um eld í geitinni klukkan fjögur í nótt og að sögn lögreglu sáust hinir grunuðu yfirgefa vettvanginn í bifreið sem var stöðvuð skömmu síðar. Þar voru þrír menn handteknir og voru tveir þeirra vistaðir í fangageymslu lögreglu.

Mbl.is hefur eftir varðstjóra hjá slökkviliðinu að geitin hafi nánast brunnið til kaldra kola. Í síðustu viku var reynt að kveikja í geitinni en þeir sem þar voru að verki höfðu ekki erindi sem erfiði. Þeir mega reyndar prísa sig sæla því litlu mátti muna að þeir kveiktu í sér, eins og sást á öryggismyndavélum og greint var frá á dögunum.

Uppfært kl.16.21: Fram kemur á vef mbl.is að kona og karl séu í haldi lög­reglu, sökuð um að hafa kveikt í jóla­geit­inni. Þriðji einstaklingurinn, sá sem var sleppt, er kona. Um er að ræða fullorðna einstaklinga en ekki er ljóst hvort um sé að ræða sömu ein­stak­linga og þá sem reyndu að kveikja í geit­inni fyr­ir helg­ina.