Annríki fyrir jólin, prófstress, mikið álag í vinnunni eða eitthvað annað sem er hægt að nota sem afsökun fyrir að fá sér orkudrykk til að geta staðið undir kröfum og álagi dagsins. En það hefur heilsufarslegar afleiðingar að drekka orkudrykki til að geta komist yfir það sem þarf að gera.

Þetta segir í umfjöllun The American Heart Association. Þar er haft eftir John Higgins, yfirlækni hjartadeildar Lyndon B. Johnson sjúkrahússins i Houston, að boðskapur hans til námsmanna og íþróttafólks sé alveg skýr: „Látið orkudrykki eiga sig“.

Hann stýrði rannsókn þar sem rannsakað var hvaða áhrif 0,7 lítrar af orkudrykk höfðu á 44 heilbrigða námsmenn á þrítugsaldri. Niðurstaðan var að eftir einn og hálfan tíma gátu æðar þeirra aðeins víkkað um helming þess sem þær gera venjulega.

„Ef maður er undir líkamlegu eða andlegu álagi þurfa æðarnar einmitt að geta víkkað svo blóð komist hraðar til vöðva, hjarta og heila.“

Segir Higgins.

Eins og víðar hefur sala á orkudrykkjum aukist mikið í Bandaríkjunum á undanförnum árum. Til að auka söluna bæta sífellt fleiri framleiðendur vítamínum við drykkina en það breytir því ekki að orkudrykkir eru í grunninn óhollir.

„Sykur- og koffínmagn er miklu meira en ráðlagður dagsskammtur, stundum allt að 10 sinnum meira eða enn meira en það.“

Segir Higgins.