Endurupptökunefnd vegna Guðmundar- og Geirfinnsmála mun ekki birta niðurstöðu sína um hugsanlega endurupptöku málsins fyrr en á næsta ári. Til stóð að nefndin myndi skila niðurstöðunni í þessum mánuði.

Mbl.is greindi fyrst frá þessu. Ástæðan er sú að ábending barst „frá mjög traustum“ aðila í síðustu viku sem nefndin til nauðsynlegt að verði rannsökuð. Björn L. Bergsson, formaður endurupptökunefndar, segir við Mbl.is að óskað hafi verið eftir því að sá sem kom ábendingunni á framfæri gefi skýrslu hjá lögreglu og ábendingin verði rannsökuð frekar. Ekki liggja fyrir nánari upplýsingar um þessa ábendingu eða hvers eðlis hún var.

Björn segist vona að rannsókn lögreglu taki ekki lengri tíma en nokkrar vikur. Segir hann að sá sem kom með ábendinguna sé einstaklingur sem hann hefur traust á að fari ekki með fleipur. Björn segir að málið sem nú er komið upp tengist ekki handtökum tveggja manna í sumar vegna morðsins á Guðmundi Einarssyni.