Carrie Fisher og Harrison Ford áttu í ástarsambandi við tökur fyrstu myndarinnar
Leikkonan Carrie Fisher, sem er þekktust fyrir hlutverk sitt sem Leia prinsessa í Star Wars-bálkinum, viðurkennir í nýútkominni ævisögu sinni að hún hafi átt í ástarsambandi við stórleikarann Harrison Ford á meðan tökum fyrstu Star Wars-myndarinnar: A New Hope stóð á áttunda áratuginum. Í bókinni, sem ber heitið Dagbókarritari prinsessu (e. The Princess Diarist) segir leikkonan: „„Þetta var svo ástríðufullt. Við vorum Han og Leia á virkum dögum en um helgar Carrie og Harrison.“ Tímaritið Peope greinir frá.
Ástarsambandið hófst árið 1976 þegar Carrie var 19 ára gömul en þá var Harrison 33 ára gamall, giftur tveggja barna faðir. Upphaf þess má rekja til þess að Harrison bauðst til þess að skutla Carrie á næturstað sinn þegar hún hafði fengið sér fullmikið í aðra tánna í afmæli leikstjórans Georg Lucas. Eitt leiddi af öðru og leikararnir enduðu með því að deila rúmi þá nótt.
Carrie segir í bók sinni að henni hafi fundist Harrison afar myndarlegur og minnist sambandsins með mikilli hlýju. „Ég var svo óreynd en ég treysti honum. Hann var svo blíður,“ segir hún. Þá segist hún hafa undrast það að jafnmikið „úrvals eintak af karlmanni“ skyldi hafa áhuga á henni.
Þá kemur fram að sambandinu hafi lokið um leið og slökkt var á myndavélunum. Nokkru síðar, árið 1979, lauk hjónabandi Ford og þáverandi eiginkonu hans, Mary Marquardt. Fisher fullyrðir að samband hennar og leikarans hafi ekkert haft með þann viðskilnað að gera.
Þess má geta að Fisher og Ford rifjuðu upp gamla takta í hlutverkum sínum sem Han Solo og Leia prinsessa í nýjustu Star Wars myndinni: The Force Awakens, sem kom út í fyrra.
