Þegar Camilla var nýorðin 18 ára glímdi hún við fjárhagsvanda. Hvað var til ráða? Hún leitaði ráða hjá vinkonu sinni en ekki um peninga, ekki um hvar hún gæti fengið vinnu. Camilla vissi að vinkonan var „sugardater“ en það orð er tengt við stúlkur/konur sem stunda stefnumót og stunda kynlíf með körlum, yfirleitt töluvert eldri, sem greiða þeim fyrir með peningum, ýmsum varningi og ferðalögum.
Vinkonan féllst á að deila Snapchatnafni Camilla á „sögu“ sinni á samfélagsmiðlinum og fljótlega fóru hjólin að snúast og skilaboð streymdu inn.
Hefur BT eftir Camilla í umfjöllun um málið. Fram kemur að hlutirnir hafi gerst hratt í kjölfarið.
Fólk er ekki á einu máli um hvort „sugardating“ er það sama og vændi en í báðum tilfellum er greitt fyrir félagsskap og oft kynlíf. Í vændi er að jafnaði greitt með peningum en í „sugardating“ er einnig oft greitt með gjöfum og ferðalögum. Töluvert hefur verið fjallað um „sugardating“ og hina svokölluðu „sykurpabba“ í Danmörku á undanförnum misserum en þessi tegund samskipta virðist vera mikið stunduð.
„Menn vissu að ég var nýorðin 18 ára en stóð alveg á sama. Sumum fannst það bara æsandi.“
Fljótlega hafði hún skipulagt fyrsta stefnumótið.
„Hann sótti mig í vinnuna og við ókum á bílastæði þar sem við töluðum aðeins saman, kysstumst og stunduðum kynlíf. Hann borgaði mér 1.500 krónur.“
Sagði Camilla um fyrsta „viðskiptavininn“.
Hún ákvað að segja sögu sína því þetta líferni hefur haft mikil áhrif á hana og sett varanleg merki á hana, góð og slæm.
Þegar hún komst á bragðið með að fá peninga, gjafir, hóteldvalir og aðrar upplifanir í skiptum fyrir kynlíf varð hún enn virkari og hitti sífellt fleiri karla. En upplifanirnar voru ekki bara jákvæðar.
„Ég hitti einn sykurpabba sem var mjög ofbeldisfullur þrátt fyrir að við hefðum samið um að þetta ætti allt að vera í rólegheitum.“
Hann hafði í hótunum við hana því hún vildi ekki stunda kynlíf með honum og segir hún að þetta hafi sett mark sitt á hana.
„Sugardating hefur haft mikil áhrif á mig – sérstaklega eftir þessa slæmu reynslu. Það að ég hafi verið svo langt niðri að ég hafi stundað kynlíf með ókunnugum mönnum er erfitt að sætta sig við.“
Segir Camilla sem hefur hitt um 25 sykurpabba fram að þessu og stundað kynlíf með þeim. Hún hefur nú „trappað“ sig niður og er hætt að hitta sykurpabba til að stunda kynlíf en selur ljósmyndir og myndbönd þar sem hún er nakin og sýnir kynferðislegar athafnir. Hún hefur hafið nám og námsstyrkurinn sem hún fær dugir til framfærslu en myndasalan er aukabúgrein. Hún segist þó reiðubúin til að hoppa aftur upp í rúm með sykurpöbbum ef fjárhagurinn versnar.
„Í mínum augum er „sugardating“ ekki það sama og að stunda vændi. Það er mikill munur þar á, sérstaklega þar sem vændiskonur hitta bara karla og stunda kynlíf með þeim og fara síðan og finna nýjan mann en í „sugardating“ byggir maður upp traust og er í einhverskonar sambandi án þess þó að vera par og án tilfinninga.“
Segir hún.
